Монгол Улсын Ерөнхийлөгч У.Хүрэлсүхийн дэвшүүлэн тавьсан “Тэрбум мод” үндэсний хөдөлгөөн нь олон улсад, Европт төдийгүй Азидаа тэргүүлэх санаачилгаар нэрлэгдэж байна. Энэ талаар Европын комисс дахь олон улсын түншлэлийн ерөнхий газрын Ази хариуцсан захирал Жан-Луи Виль манай улсын БОАЖ-ын дэд сайд Г.Түвдэндоржтой уулзах үеэр онцолсон юм.
Дэд сайд Г.Түвдэндорж ноён Жан-Луи Виль нар уулзалтаараа “Тэрбум мод” үндэсний хөдөлгөөн, ойн аж ахуй чиглэлээр санал солилцсон. Уулзалтын эхэнд, Монгол Улсыг хариуцсан хамтын ажиллагааны газрын дарга Даниел Хачез уулзалтын бүрэлдэхүүнд Монголд ирсэн ажлын хэсгээ танилцуулж, Монгол улс хилээ нээж, бид анхны зочид болсондоо баяртай байна гэдгээ илэрхийлэв.
БОАЖ-ын дэд сайд Г.Түвдэндорж хэлэхдээ, Европын Холбоо болон түүний гишүүн орнуудын хэрэгжүүлсэн төсөл, хөтөлбөр нь уур амьсгалын өөрчлөлтөд дасан зохицох, биологийн олон янз байдлыг хамгаалах, био аюулгүй ажиллагааны аргачлал, шийдлийг нутагшуулах, боловсон хүчнийг бэлтгэх, гадаад хамтын ажиллагааг хөгжүүлэхэд бодитой хувь нэмэр оруулж буйд талархаж буйгаа илэрхийлсэн. Европын Холбооны санхүүжилттэй хэрэгжсэн төслүүд цар тахлын үед био-аюулгүй ажиллагааг хангахад ихээхэн хувь нэмрээ оруулсныг онцолсон юм.
Европын комисс дахь олон улсын түншлэлийн ерөнхий газрын Ази хариуцсан захирал Жан-Луи Виль ярихдаа, өнгөрсөн хугацаанд бид олон чиглэлээр хамтран ажиллаж ирсэн. 2021-2027 он хүртэл хэрэгжих олон талт баримжаат хөтөлбөрийн хүрээнд эдийн засгийн олон хэмжигдэхүүнийг гарган тавьж байгааг тодотгосон юм. Тэрээр, Монгол Улсын Ерөнхийлөгчийн санаачилга “Тэрбум мод” үндэсний хөдөлгөөн нь байгаль орчин, ойн аж ахуйг хамгаалан хөгжүүлэх чиглэлийн хамгийн оновчтой санаачилга, шийдэл гэдгийг тодотгож, “Тэрбум мод” санаачилга нь Европт төдийгүй Азидаа тэргүүлэх санаачилгаар нэрлэгдэж буйг дуулгалаа.
Талууд хамтын ажиллагаагаа өргөжүүлэн ойн хомсдол, газрын доройтол, хүлэмжийг хийг бууруулах, ойн аж ахуйг хөгжүүлэх чиглэлээр хамтран ажиллахаар санал нэгдэв. Уулзалтын төгсгөлд дэд сайд Г.Түвдэндорж Европын Холбоо болон түүний гишүүн орнуудтай ойн салбарын хамтын ажиллагааг эрчимжүүлэх чиглэлээр яриа хэлэлцээг үргэлжлүүлнэ. “Тэрбум мод” үндэсний хөдөлгөөнөөр зогсохгүй, ойн салбарыг эдийн засгийн эргэлтэд оруулах, ногоон ажлын байрыг бий болгох хүрээнд бүхий л боломжит арга хэлбэрээр хамтарч ажиллахад бэлэн байна гэв.
Эх сурвалж:/МОНЦАМЭ/
