Нүүрсний асуудлыг шалгах УИХ-ын Хянан шалгах түр хорооны хуралдаан өнөөдөр /2022.12.13/ төрийн ордонд боллоо. Хуралдаанд “Эрдэнэс Тавантолгой” ХК-ийн Засгийн газрын Онцгой бүрэн эрхт төлөөлөгч Ж.Ганбат оролцож компанийн нөхцөл байдал, нууцын зэрэглэлээс гаргасан гэрээтэй холбоотой мэдээлэл өглөө.

“Эрдэнэс Тавантолгой” ХК 2010 онд байгуулагдсан. Үйл ажиллагаа явуулж эхэлснээс хойш нийт 86.0 сая тонн нүүрс борлуулж  4.9 тэрбум ам.доллар буюу 12.8 их наяд төгрөгийн борлуулалтын орлого олсон. Мөн үүсгэн байгуулагдсанаас хойш улсын төсөв болон орон нутгийн төсөвт 3.1 их наяд төгрөгийн татвар төвлөрүүлсэн байна.

Засгийн газрын 362 дугаар тогтоолын хүрээнд борлуулалтын орлогыг нэмэгдүүлж 500 сая ам.долларыг төсөвт төвлөрүүлэхээр ажиллаж  байгаа тухайгаа Бүрэн эрхт төлөөлөгч УИХ-ын Хянан шалгах түр хорооны гишүүдэд дэлгэрэнгүй танилцууллаа.

2022 онд Баруун Зүүн цанхийн уурхайн уулын ажлын төлбөрийг нүүрсээр барагдуулах гэрээ байгуулж нийт 781.4 мянган тонн нүүрс нийлүүлсэн. Нүүрсээр төлбөр барагдуулахдаа 7-10 хувийн хөнгөлттэй үнээр худалдаалж компанид орох орлогыг 31.1 тэрбум төгрөгөөр бууруулсан байна. Цаашид нүүрсээр төлбөр төлдөг байдлыг зогсоож зөвхөн бэлэн мөнгөөр төлбөр тооцоо хийдэг байдалд шилжиж ажиллана хэмээн хэллээ.

Мөн Засгийн газрын 449 дүгээр тогтоолоор нууцын зэрэглэлээс гаргасан гэрээнүүдийн талаар танилцуулж, “Эрдэнэс Тавантолгой” ХК-д санхүүгийн сахилга баттай холбоотой олон зөрчил илэрч байгаа. Үүнийг шат дараатайгаар цэгцэлж компанийн үйл ажиллагааг олон нийтэд ил тод нээлттэй болгох ажил үргэлжилнэ гэв.

“Эрдэнэс Тавантолгой” ХК-ийн Хэвлэл мэдээлэл, Олон нийттэй харилцах хэлтэс

Нүүрсний асуудлыг шалгах УИХ-ын гишүүн, Хянан шалгах түр хорооны дарга Г.Ганболд, УИХ-ын гишүүн, ажлын хэсгийн гишүүн Н.Наранбаатар, Б.Бейсен, Т.Доржханд нар өнөөдөр “Эрдэнэс Тавантолгой” ХК-д ажиллалаа. Ажлын хэсгийн гишүүдэд Засгийн газрын Онцгой бүрэн эрхт төлөөлөгч Ж.Ганбат Засгийн газрын 362 дугаарын тогтоолын хүрээнд авч хэрэгжүүлсэн арга хэмжээг танилцууллаа.

Компанийн үйл ажиллагаа тэр тундаа нүүрс олборлох, тээвэрлэх, худалдан борлуулахтай холбоотой бүхий л мэдээллийг олон нийтэд нээлттэй, ил тод болгож, Засгийн газрын 449 дүгээр тогтоолын хүрээнд төрийн нууцад хамаарах гэрээнүүдийг нууцаас гаргаж олон нийтэд ил болгосон. Цаашид нүүрс худалдан борлуулах ажлыг цахим, биржээр дамжуулан хил үнээр худалдаалахаар бэлтгэл хангаж байгаа гэдгийг Засгийн газрын Онцгой бүрэн эрхт төлөөлөгч Ж.Ганбат онцоллоо.

Нүүрсний асуудлыг шалгах УИХ-ын хянан шалгах түр хорооны гишүүд ил болгосон нууцын зэрэглэлтэй гэрээний талаар асууж тодрууллаа. Мөн энэ сарын 21-ний лхагва гарагт Нүүрсний асуудлаар Төрийн ордонд нээлттэй сонсгол зохион байгуулж илүү дэлгэрэнгүй мэдээлэл олон нийтэд өгөх асуудлаар ярилцлаа.

“Эрдэнэс Тавантолгой” ХК-ийн Хэвлэл мэдээлэл, олон нийттэй харилцах хэлтэс

“Эрдэнэс Тавантолгой” ХК 2022.12.07-ны өдөр 1052 тээврийн хэрэгслээр 108,123 тонн нүүрс ачиж компанийн түүхэнд дээд амжилт тогтоогоод байсан бол 2022.12.08 өдрийн 00:00-24:00 цагийн хооронд уурхайгаас нийт 1062 тээврийн хэрэгслээр 110,618 тонн нүүрс ачиж өмнөх өдрийн болон түүхэн рекордоо дахин шинэчиллээ. Нийт гаргасан нүүрсний хувьд 856 тээврийн хэрэгслээр 92,372 тонн коксжих нүүрс, 203 тээврийн хэрэгслээр 18,246 тонн эрчим хүчний нүүрс тус тус ачиж гаргалаа. Компанийн түүхэнд дахин шинэ амжилт тогтоосон нийт уурхайчид, тээвэрчиддээ талархал дэвшүүлье.

Засгийн газрын 2022 оны 362 тоот тогтоолоор “Эрдэнэс Тавантолгой” ХК дээр хадгалагдаж буй нууцад хамаарах гэрээ, түүний хэрэгжилтийн мэдээллийг нууцаас гаргаж, ил тод болгох арга хэмжээ авах үүрэг өгсөн.

Үүний дагуу өнөөдрийн (2022-12-09) Засгийн газрын ээлжит бус хуралдаанаар “Эрдэнэс Тавантолгой” ХК-аас хэрэгжүүлж буй 9 төсөлтэй холбоотой гэрээг нууцын зэрэглэлээс гарган, ил тод болгох шийдвэр гаргалаа.

“Эрдэнэс Тавантолгой” ХК нь 2019 оноос эхлэн үндэсний хэмжээний томоохон төсөл, хөтөлбөрүүдийг хэрэгжүүлэх, санхүүжүүлэх үүргийг гүйцэтгэж ирсэн бөгөөд үүнээс Үндэсний аюулгүй байдлын зөвлөлийн бодлого, чиглэлийн дагуу төмөр замын төслүүдийг, компанийн санаачилгаар ил, далд уурхайн бүтээн байгуулалт болон Загийн усны төслийг төрийн нууцад хамааруулсан байсныг өнөөдөр нууцаас гаргахаар шийдвэрлэлээ.

Үүнд:

1. “Эрдэнэс Тавантолгой” ХК, “Тавантолгой төмөр зам” ХХК, “Бодь интернэшнл” ХХК-ийн хооронд 2019 оны 10 дугаар сарын 29-ний өдөр байгуулсан Тавантолгой-Гашуунсухайт чиглэлийн төмөр замын төслийн бүтээн байгуулалтын зураг төсөл, худалдан авалт, барилгын ажлын санхүүжилтийн ЭТТ-2019/825, ТТЗ-Н19/01-01, BI-TTGS-CONT-0002 тоот гэрээ, түүний нэмэлт өөрчлөлт;

2. “Эрдэнэс Тавантолгой” ХК, “Бодь интернэшнл” ХХК-ийн хооронд 2019 оны 11 дүгээр сарын 13-ны өдөр байгуулсан Нүүрс нийлүүлэх ЭТТ-2019/784, BI-TTGS-CONT-0003 тоот гэрээ, түүний нэмэлт, өөрчлөлт;

3. “Монголын төмөр зам” ТӨХК, ЗХЖШ-ын хооронд 2019 оны 06 дугаар сарын 12-ны өдөр байгуулсан Тавантолгой-Зүүнбаян чиглэлийн төмөр замын шугамын доод бүтцийн барилгын ажил гүйцэтгэх АГГ-н/1901 н/387 тоот гэрээ

4. “Монголын төмөр зам” ТӨХК, УБТЗ ХНН-ийн хооронд 2020 оны 02 дугаар сарын 05-ны өдөр байгуулсан Тавантолгой-Зүүнбаян чиглэлийн төмөр замын дээд бүтэц дохиолол холбоо, эрчим хүч, гүүр, хоолойн барилгын ажил, зураг төсөл гүйцэтгэх АГГ-20/21-20/06 ОГ/20/042 тоот гэрээ

5. “Эрдэнэс Тавантолгой ХК, “Тавантолгой төмөр зам” ХХК-ийн хооронд 2022 оны 06 дугаар сарын 28-ны өдөр байгуулсан Богдхан төмөр замын төслийн суурь, бүтцийн барилгын угсралтын бүтээн байгуулалтын ажлын санхүүжилтийн МН-ЭТТ2022/497, ТТЗ-МН22/02 тоот гэрээ;

6. “Эрдэнэс Тавантолгой” ХК, “Тавантолгой төмөрзам” ХХК, “Бодь интернэшнл” ХХК- хооронд 2022 оны 06 дугаар сарын 27-ны өдөр байгуулсан Богдхан төмөр зам төслийн туннел болон эстакадан гүүрний зураг төсөл, худалдан авалт, барилгын ажлын санхүүжилтийн МН-ЭТТ/487, ТТЗ-МН22/01, BI-BBR-CONT-0002 тоот гэрээ;

7. “Эрдэнэс Тавантолгой ХК, “Бодь интернэшнл” ХХК-ийн хооронд 2022 оны 06 дугаар сарын 27-ны өдөр байгуулсан Нүүрс нийлүүлэх МН-ЭТТ-2022/488, BI-BBR-CONT-0003 тоот гэрээ;

8. “Эрдэнэс Тавантолгой ХК “Набсан” ХХК, “Тэргүүн инвест” ХХК “Эс энд Эй трэйд” ХХК, “Бридж констракшн” ХХК, “ЧММ” ХХК, “Сан” ХХК-ийн хооронд 2022 оны 01 дүгээр сарын 28-ны өдөр байгуулсан Загийн усны хоолойн гүний усны ордоос “Эрдэнэс Тавантолгой” ХК-ийн нүүрсний уурхай хүртэлх усны хангамжийн шугам хоолойн барилга угсралтын ажлын ЭТТ-2022/34, ЭТТ-2022/35, ЭТТ-2022/36, ЭТТ-2022/37 тоот гэрээ;

9. “Эрдэнэс Тавантолгой ХК, “Элгэн” ХХК, “Литопро” ХХК, “Инженер геодези” ХХК, “Эс Жи Эс Ай Эм Эм И Монголиа” ХХК-ийн хооронд 2022 оны 10 дугаар сарын 25-ны өдөр байгуулсан Тавантолгой ордын далд уурхайн хайгуул, судалгааны ажил гүйцэтгэх Н-ЭТТ-2022/946 тоот гэрээ зэрэг болно.

Цаашид бүтээн байгуулалтын төслүүдийг Үндэсний аюулгүй байдлын зөвлөмжөөр нууцад хамааруулдаг байдлыг таслан зогсоож, Засгийн газар нэг ч нууц гэрээ байгуулахгүй, батлахгүй гэсэн шийдэлд хүрсэн хэмээн Засгийн газрын Хэрэг эрхлэх газрын дарга Д.Амарбаясгалан мэдэгдлээ.

“Эрдэнэс Тавантолгой” ХК-ийн Хэвлэл мэдээлэл, олон нийттэй харилцах хэлтэс

Эрдэнэс Тавантолгой ХК-д Засгийн газрын Онцгой бүрэн эрхт төлөөлөгч томилогдон компанийн үйл ажиллагааг ил тод, нээлттэй болгох, ачилт борлуулалтыг нэмэгдүүлэх төлөвлөгөө гарган ажиллаж байна.

2022.12.07-ны өдрийн 00:00-24:00 цагийн хооронд уурхайгаас 1052 тээврийн хэрэгслээр 108,123 тонн нүүрс тээвэрлэлээ. Энэ нь “Эрдэнэс Тавантолгой” ХК үүсгэн байгуулагдсан цагаас хойших нэг өдөрт нүүрс ачиж гаргасан  хамгийн өндөр  түүхэн дээд үзүүлэлт юм.

Компанийн түүхэнд хамгийн өндөр үзүүлэлт гарган ажилласан нийт уурхайчид, тээвэрчиддээ талархал дэвшүүлье.

Өнөөдрийн Засгийн газрын хуралдаанд “Эрдэнэс Тавантолгой” ХК-ийн Онцгой бүрэн эрхт төлөөлөгч Ж.Ганбат Засгийн газрын 362 дугаар тогтоолын хэрэгжилтийн хүрээнд авч хэрэгжүүлсэн арга хэмжээний танилцуулга хийлээ.

Монгол Улсын Засгийн газрын 2022 оны 10 дугаар сарын 05-ны өдрийн 362 тоот тогтоолын хэрэгжилтийг хангах ажлын хүрээнд нүүрсээр төлбөрийг барагдуулах нөхцөлтэй гэрээний нийт ачилтад эзлэх хувийг 19 хувиас 13 хувь хүртэл бууруулж, өндөр дүнтэй урьдчилгаа төлсөн худалдан авагчтай хэлцэл хийх замаар валютын орох урсгалыг нэмэгдүүлэх арга хэмжээ авсны үр дүнд тогтоол гарснаас хойш 2022.12.05-ны өдрийг хүртэл хугацаанд нийт 369.5 сая ам.долларын үнэлгээтэй 4.2 сая тонн нүүрс борлуулсан. Үүнээс зөвхөн 11 дүгээр сард 205.5 сая ам.долларын үнэлгээтэй 2.3 сая тн нүүрс борлуулж, 1.5 сая тонн нүүрс экспортолсон байна.

Нийт борлуулалтаас нүүрсээр төлбөрийг барагдуулах нөхцөлтэй гэрээний дагуу 51.1 сая ам.доллар, өндөр дүнтэй урьдчилгаа авсан гэрээний дагуу 185.8 сая ам.долларыг нүүрсээр барагдуулж, 143.8 сая ам.долларыг Монголбанканд тушаагаад байна. Ингэснээр санхүүгийн үзүүлэлтийг сайжруулан, 2022 оны 10 дугаар сарын 05-ны өдрийн 603 сая ам.долларын өр төлбөрийг 418 сая ам.доллар хүртэл бууруулаад байна.

“Эрдэнэс Тавантолгой” ХК-ийн  ажлын хэсгээс 11 дүгээр сарын 14-ны өдөр Тагнуулын Ерөнхий газарт нууцын зэрэглэлтэй гэрээг ил болгох асуудлаар дүгнэлтээ хүргүүлсэн. Тагнуулын Ерөнхий газар ажлын хэсгийн дүгнэлтийн дагуу нууцын зэрэглэлтэй гэрээг хуулийн хүрээнд ил болгохыг дэмжсэн хариуг 11 дүгээр сарын 22-нд ирүүлсэн. Үүний дагуу ЗГХЭГ-т нууцын зэрэглэлтэй гэрээг ил болгох хүсэлт тавьж өнөөдрийн Засгийн газрын хуралдаанаар хэлэлцүүлж дэмжлээ. Гэхдээ гэрээний нөгөө тал болох БНХАУ-ын талд Гадаад харилцааны яамаар дамжуулан нууцын зэрэглэлтэй гэрээг ил болгох хүсэлт хүргүүлж,  БНХАУ-ын талаас  хариу авахаар тохирсон байна.

Богинын тээврийн үйл ажиллагааг идэвхжүүлж экспортыг нэмэгдүүлэх арга хэмжээ авч ажилласны үр дүнд 2022 оны 10 дугаар сарын эхээр 53.5 мянган тонн хүртэл буураад байсан экспортыг 110.9 мянган тоннд хүргэн 2 дахин,  өдрийн ачилтын хэмжээ 19.8 мянган тонн, 202 тээврийн хэрэгсэл хүртэл буураад байсныг өдөрт дунджаар 75.4 мянган тонн, 721 тээврийн хэрэгсэл хүртэл нэмэгдүүлэн 3.8 дахин өсгөж, нэг өдөрт хамгийн ихдээ 1028 тээврийн хэрэгслээр 100.8 тонн нүүрс ачуулсан байна.

“Эрдэнэс Тавантолгой” ХК-ийн ил тод байдлыг хангах, олон нийт хяналт тавих нөхцөл бүрдүүлэх зорилгоор нүүрс борлуулалтын 142 гэрээ, уурхайн ачилтын үзүүлэлт, олборлолтын гэрээнүүдийг нээлттэй болгосон тухай мэдээлэв.

Түүнчлэн өнөөдрийн Засгийн газрын ээлжит хуралдаанаар ХЗДХ-ийн сайд Х.Нямбаатараар ахлуулсан нүүрсний хэргийг мөрдөн шалгах ажиллагаанд дэмжлэг үзүүлэх ажлын хэсэг байгууллаа. Засгийн газрын Ажлын хэсэг нь холбогдох яам, агентлагуудаас шаардлагатай мэдээлэл, материалуудыг яаралтай гаргах, агентлаг хоорондын уялдааг хангах, Эрх зүйн талаар харилцан туслалцаа үзүүлэх, БНХАУ-аас шаардлагатай мэдээллүүд гаргах чиг үүрэгтэй ажиллах юм байна.

“Эрдэнэс Тавантолгой” ХК-ий Хэвлэл мэдээлэл, олон нийттэй харилцлах хэлтэс

Эрчим хүчний сайд Б.Чойжилсүрэн, “Эрдэнэс Тавантолгой” ХК-ийн Онцгой бүрэн эрхт төлөөлөгч Ж.Ганбат тэргүүтэй албаны хүмүүс энэ сарын 4, 5-ны өдрүүдэд Өмнөговь аймагт ажиллалаа. Эрдэнэс Тавантолгой нүүрсний уурхайг түшиглэн баригдах Нүүрс баяжуулах үйлдвэрт шаардлагатай усны хэрэгцээг хангах “Загийн усны хоолой”-н төслийн бүтээн байгуулалтын ажил, Тавантолгой дулааны станцын төслийн талаарх мэдээлэлтэй танилцсан бөгөөд тус үйлдвэр нь жилд 10 сая тонн хүртэлх нүүрсийг баяжуулах хүчин чадалтай.

Нүүрс баяжуулах үйлдвэр ашиглалтад орсноор Тавантолгойн нүүрсний ордоос шууд олборлон борлуулах боломжгүй давхаргуудыг эдийн засгийн эргэлтэд оруулах, ордын нөөцийг хаягдал багатай бүрэн ашиглах, экспортын орлогыг нэмэгдүүлж, худалдан авагчийн шаардлагад нийцүүлэн бүтээгдэхүүн үйлдвэрлэх, экологийн сөрөг нөлөөллийг бууруулах, нэмүү өртөг шингэсэн бүтээгдэхүүний үйлдвэрлэлийн хэмжээ, үр ашгийг нэмэгдүүлэх зэрэг олон давуу талтай.

Мөн нүүрс баяжуулах үйлдвэрийн ойролцоо Тавантолгой цахилгаан станц баригдахаар төлөвлөгдөж буй. Тиймээс “Загийн усны хоолой”-н хүчин чадлыг тооцоолж нүүрс баяжуулах үйлдвэрт ашиглаад үлдэгдэл нөөц усыг цахилгаан станцад ашиглах боломж бололцоотой эсэх, эдгээр төслийн  уялдаа холбоог хангах тал дээр хоёр талын ажлын хэсэг байгуулан ажиллаж саналуудаа нэгтгэхээр тохирлоо.

Онцгой бүрэн эрхт төлөөлөгч Ж.Ганбат уурхайд ажиллах үеэрээ  Цанхийн Зүүн уурхайн урд хэсэг  буюу орон нутгийн  “Тавантолгой” ХК-ийн талбайн хойд хэсэгтэй огтлолцдог нүүрсэн мөргөцөг дутсан талбайд ажиллав. Мөн уурхайн ажилчдын орон сууцны  барилгын явцтай танилцаж энэ ондоо багтаан дуусгах үүрэг чиглэл өглөө.

“Эрдэнэс Тавантолгой” ХК-ийн Хэвлэл мэдээлэл, олон нийттэй харилцах хэлтэс

“Эрдэнэс Тавантолгой” ХК нь хүний эрхийг хүндэтгэн ажиллах хүсэл эрмэлзэлтэй, хүний эрхийн мэдрэмжтэй, мэдлэг, мэдээлэлтэй ажилтан, ажил олгогчийг бий болгох, хөдөлмөрийн харилцааг сайжруулах, ажилтны зөрчигдсөн эрхийг сэргээх зорилгоор Европын холбооны санхүүжилттэй, Шведын Байгаль хамгаалал сангийн Байгаль орчны засаглалын дэмжлэгтэй НҮБ-ын Хөгжлийн хөтөлбөрийн “Бизнес ба хүний эрх” төслийн хүрээнд  “Хүний эрхийн магадлан шинжилгээ”-г “Эрдэс Баялаг эмэгтэйчүүдийн холбоо” НҮТББ-тай хамтран анх удаа хийж, үүний дагуу сайжруулалтын төлөвлөгөө гарган тодорхой үр дүн гарган ажиллалаа.

Энэхүү төслийг эрдэс баялаг, ноос ноолуур, хүнсний салбарт хэрэгжүүлж гарсан үр дүн, хэрэгжүүлсэн арга хэмжээний тайланг сонслоо. “Эрдэнэс Тавантолгой” ХК нь энэхүү тайлангаа олон нийтэд ил тод болгож байгууллагын цахим хуудсанд байршуулах, сайн туршлагаа хуваалцаж, гэрээт болон ханган нийлүүлэгчдээ уриалж манлайлж ажиллана гэдгээ илэрхийллээ.

“Эрдэнэс Тавантолгой” ХК-ийн Хэвлэл мэдээлэл, олон нийттэй харилцах хэлтэс

Засгийн газрын 362 тогтоолын хэрэгжилтийг хангах хүрээнд Эрдэнэс Тавантолгой ХК-ийн нүүрс тээвэр, борлуулалтыг нэмэгдүүлж, ил тод, нээлттэй болгосон. Монгол тээврийн нэгдлээс нүүрс тээврийг нэмэгдүүлэх хүрээнд хамтарч ажиллах хүсэлтийг Эрдэнэс Тавантолгой ХК-ийн удирдлагуудад хүргүүлээд байсан юм. Тус компанийн төлөөллийг Засгийн газрын онцгой бүрэн эрхт төлөөлөгч Ж.Ганбат өнөөдөр хүлээн авч уулзлаа.

Монгол тээврийн нэгдэл ХХК-ийн хувьд үндэсний 30 компанийг нэгтгэсэн 1400 гаруй хөдлөх бүрэлдэхүүнээр уртын болон богинын тээвэрт ачилт хийдэг юм байна. Тэд Монгол Улсын Засгийн газрын 362 дугаар тогтоолыг дэмжиж буйгаа илэрхийлж цаашид Эрдэнэс Тавантолгой ХК-ийн уурхайн тээвэрт хамтран ажиллах хүсэлтэй байгаагаа хэллээ.

Уулзалтын үеэр Онцгой бүрэн эрхт төлөөлөгч Ж.Ганбат ямар ч тохиолдолд үндэсний тээвэрлэгчдээ дэмжих бодлого баримтална. Хамгийн гол нь тээвэрчид нэгдмэл нэг бодлого, уялдаа холбоотой байх шаардлагатайг онцоллоо.