Монгол Улсын Ерөнхийлөгч, Зэвсэгт хүчний Ерөнхий командлагчийг тус ангийн байрлалд хүрэлцэн ирэхэд ангийн бие бүрэлдэхүүн жагсан угтаж, ангийн захирагч, хурандаа Р.Эрдэнэтогтох ангийн үйл ажиллагааг танилцууллаа.

Ангийн бие бүрэлдэхүүнтэй хийсэн уулзалтын үеэрээ Монгол Улсын Ерөнхийлөгч эх орны баруун хязгаарыг сахин хамгаалж буй хилийн цэргийн 0165 дугаар ангийн хилчин дайчид болон тэдний гэр бүлийнхэнд Монгол төрийн нэрийн өмнөөс талархал илэрхийллээ.

Төр, засгаас хил хамгаалах байгууллагын үүрэг гүйцэтгэх чадавх, боомтын хүчин чадал нэмэгдүүлэх талаар ихээхэн анхаарч байгаа бөгөөд “Цагааннуур” боомтын чөлөөт бүсийг байнгын ажиллагаатай болгохоор шийдвэрлэж, цаашид Даянгийн боомттой авто замаар холбохоор төлөвлөж байгааг дурдав.

Баян-Өлгий аймаг дахь Цагааннуур, Даян, Өлгий боомтууд нь Монгол-Орос, Монгол-Хятад, Монгол-Казакстан улсын эдийн засгийн холбоос, ард түмнүүдийн харилцааны гүүр болж байдаг улсын хил хамгаалалтын чухал хэсгүүд гэдгийг онцоллоо.

Тиймээс Монгол Улсын баруун хилийн халдашгүй дархан байдлыг найдвартай хамгаалахын зэрэгцээ хилийн боомтуудын аюулгүй байдлыг хангах, шалган нэвтрүүлэх үйл ажиллагааг нягт нямбай, түргэн шуурхай, соёлтой явуулахад анхаарч ажиллахыг Зэвсэгт хүчний Ерөнхий командлагч үүрэг болгов.

Цэргийн хэргийн мэдлэг, мэргэжлийн болон гадаад хэлний ур чадвараа байнга дээшлүүлж, төрийн албан хаагчийн ёс зүйн хэм хэмжээг чанд мөрдөн авлига, ашиг сонирхлын зөрчлөөс ангид ажиллана гэдэгт итгэлтэй байгаагаа хэллээ.

Монгол Улсын Ерөнхийлөгч эх орныхоо дархан хилийг хамгаалах үйл хэрэгт хүчин зүтгэж буй хилчин дайчид болон ажил, амьдралын бат бэх ар тал болсон гэр бүлд нь эрүүл энх, аз жаргал, сайн сайхныг хүсэн ерөөж, амжилт хүсэв.

Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүх хилийн цэргийн 0165 дугаар ангид ажиллах үеэрээ тус ангид машин, техник гардуулах ёслолд оролцлоо.

Олон нийтийн сүлжээнд хүний эрхийг хамгаалах тухай хууль болон дагалдан батлагдсан нэр бүхий хуулиудад бүхэлд нь тавьсан Монгол Улсын Ерөнхийлөгчийн хоригийг Улсын Их Хурлын чуулганы нэгдсэн хуралдаанд оролцсон гишүүдийн 89.1 хувь нь хүлээж авах нь зүйтэй гэж үзлээ.

Монгол Улсын Засгийн газраас 2023 оны 01 дүгээр сарын 18-ны өдөр өргөн барьсан Олон нийтийн сүлжээнд хүний эрхийг хамгаалах тухай, Харилцаа холбооны тухай хуульд нэмэлт, өөрчлөлт оруулах тухай, Кибер аюулгүй байдлын тухай хуульд нэмэлт оруулах тухай, Хүний хувийн мэдээлэл хамгаалах тухай хуульд нэмэлт оруулах тухай, Татварын ерөнхий хуульд өөрчлөлт оруулах тухай хуулиудыг Монгол Улсын Их Хурал 2023 оны 01 дүгээр сарын 20-ны өдөр эцэслэн баталсан.

Монгол Улсын Ерөнхийлөгч Ухнаагийн Хүрэлсүх Монгол Улсын Үндсэн хуулийн Гучин гуравдугаар зүйлийн 1 дэх хэсгийн 1, Монгол Улсын Ерөнхийлөгчийн тухай хуулийн 12 дугаар зүйлийн 8 дахь хэсгийг тус тус үндэслэн дээрх хуулиудад бүхэлд нь хориг тавьсан юм.

Ерөнхийлөгч “Хуулийн төслийг боловсруулах, хэлэлцэн батлах үйл явцад иргэн, олон нийтийн оролцоог хангаагүй, эрх, хууль ёсны ашиг сонирхол нь хөндөгдөх этгээд, төрийн болон төрийн бус байгууллага, мэргэжлийн болон судалгааны байгууллагаар хэлэлцүүлж, саналыг аваагүй нь Монгол Улсын Үндсэн хуулийн Хорин зургадугаар зүйлийн 2 дахь хэсэгт “Иргэд, бусад байгууллага хуулийн төслийн тухай саналаа хууль санаачлагчид уламжилна.”, Хууль тогтоомжийн тухай хуулийн 8 дугаар зүйлийн 8.1.5, 8.1.6 дахь заалт, 38 дугаар зүйлийг тус тус зөрчсөн байна.

Энэ нь Монгол Улсын Үндсэн хуулийн Нэгдүгээр зүйлийн 2 дахь хэсгийн “Ардчилсан ёс, … үндэсний эв нэгдлийг хангах, хууль дээдлэх нь төрийн үйл ажиллагааны үндсэн зарчим мөн” гэсэн заалтыг зөрчих нөхцөлийг бий болгосон.

Монгол Улсын Үндсэн хуулийн 19 дүгээр зүйлийн 1 дэх хэсэгт “Төрөөс хүний эрх, эрх чөлөөг хангахуйц эдийн засаг, нийгэм, хууль зүйн болон бусад баталгааг бүрдүүлэх, хүний эрх, эрх чөлөөг зөрчихтэй тэмцэх, хөндөгдсөн эрхийг сэргээн эдлүүлэх үүргийг иргэнийхээ өмнө хариуцна” гэж заасан.

Мөн Монгол Улсын Үндсэн хуулийн 19 дүгээр зүйлийн 3 дахь хэсэгт “Хүн эрх, эрх чөлөөгөө эдлэхдээ үндэсний аюулгүй байдал, бусад хүний эрх, эрх чөлөөг хохироож, нийгмийн дэг журмыг гажуудуулж болохгүй” хэмээн хязгаарлалт тогтоосныг анхаарч байх ёстой.

Хүний эрх, эрх чөлөөтэй холбоотой аливаа хууль тогтоомжийг боловсруулах, хэлэлцэн батлахдаа олон нийтийн оролцоог сайтар ханган, мэргэжлийн болон судалгааны байгууллагын санаа бодлыг сонсож, олон улсын сайн туршлага, судалгаа шинжилгээнд суурилан, Үндсэн хуулиар баталгаажсан хүний эрх, эрх чөлөө, хууль дээдлэх зарчмыг чанд баримталж байх учиртай.

Монгол Улсын Их Хурлын чуулганы хуралдааны дэгийн тухай хуулийн 45 дугаар зүйлийн 45.5 дахь хэсэгт “Энэ хуулийн 45.4-т заасны дагуу илгээсэн хууль, тогтоолыг Монгол Улсын Ерөнхийлөгчийн Тамгын газар хүлээж авсан өдрөөс хойш ажлын 5 өдөрт багтаан Монгол Улсын Ерөнхийлөгч тухайн хууль, тогтоолыг бүхэлд нь буюу түүний зарим хэсэгт хориг тавих эсэх асуудлыг шийдвэрлэнэ” гэж заасан.

Олон нийтийн сүлжээнд хүний эрхийг хамгаалах тухай болон түүнийг дагалдан баталсан хуулиудын дагаж мөрдөх хугацаа 2023 оны 02 дугаар сарын 01-ний өдөр байхаар хуульчилсан нь Монгол Улсын Үндсэн хуулийн болон Монгол Улсын Их Хурлын чуулганы хуралдааны дэгийн тухай хуулийн холбогдох хэсгүүдийг зөрчиж, Монгол Улсын Ерөнхийлөгчийн хориг тавих эрхийг хязгаарласан байна” гэж үзсэн юм.

Монгол Улсын Ерөнхийлөгч Ухнаагийн Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд “Сэнтрал Экспресс Си Ви Эс” ХК-ийн хоол боловсруулах үйлдвэр, сав, баглаа боодлын “Шинэ Гантиг” ХХК, хиам, махан бүтээгдэхүүн үйлдвэрлэлийн “Траст Tрейд” ХХК-д ажиллалаа.

“Хүнсний хангамж, аюулгүй байдал” үндэсний хөдөлгөөний хүрээнд 2023 оны төсөвт 223 орчим тэрбум төгрөг тусгасан нь  хүнс, хөдөө аж ахуйн салбарт сүүлийн 30 гаруй жил хийгдээгүй дэмжлэг юм.

Мал аж ахуйн салбарт 17 тэрбум, газар тариалангийн салбарт 52 тэрбум төгрөгийн зээлийн хүүгийн хөнгөлөлт үзүүлнэ.

Олон жил хүсэн хүлээж байсан 3-5 жилийн хугацаатай, 3-5 хувийн хүүтэй, нийт нэг их наяд төгрөгийн зээл олгохоор болсонд үндэсний үйлдвэрлэгч аж ахуйн нэгжүүд, баялаг бүтээгчид талархал илэрхийллээ.

Мөн жилийн 1.5 тэрбум төгрөгөөс доош борлуулалтын орлоготой аж ахуйн нэгжүүдийн орлогын албан татварыг 90 хувиар хөнгөлж, зарим төрлийн хүнсний бүтээгдэхүүнийг НӨАТ-аас чөлөөлсөн.

Дотоодын зах зээлээ хамгаалж, аж ахуйн нэгжүүдээ дэмжих үүднээс зарим нэр төрлийн хүнсний бүтээгдэхүүний импортын татварыг үе шаттай нэмэхээр төлөвлөж байна.

Эдгээр дэмжлэг нь үйл ажиллагаагаа тасралтгүй үргэлжлүүлэх, өргөжүүлэх, ажлын байр бий болгох, ирэх таван жилд гол нэр төрлийн 19 хүнсний  бүтээгдэхүүнээр дотоодын хэрэгцээгээ хангахад чухал хувь нэмэр оруулна гэдгийг аж ахуйн нэгжийн удирдлагууд хэлж байлаа.

Цаашид хүнсний үйлдвэрлэлийн цогцолборууд байгуулах, төрийн худалдан авалтыг эх оронч худалдан авалтад чиглүүлэх, хөнгөн үйлдвэрлэлийн салбарыг хүнсний үйлдвэрлэлийн салбартай адил хэмжээнд авч үзэн дэмжлэг үзүүлэхийг Монгол Улсын Ерөнхийлөгчөөс хүсэв.