ЦХХХ-ны сайд Н.Учрал, Австри Улсын Холбооны Сангийн яамны Төрийн нарийн бичгийн дарга, цахим хөгжлийн асуудал хариуцсан Засгийн газрын гишүүн Флориан Турскитэй Вена хотноо албан уулзалт хийлээ.
Уулзалтын үеэр энэ оны 6 дугаар сард Улаанбаатар хотод болох Мэдээлэл, харилцаа холбооны олон улсын үзэсгэлэн, Хөрөнгө оруулагчдын чуулга уулзалтад Австрийн төлөөлөгчдийг оролцохыг урилаа.
БНСУ-ын Пусан хотод 10 мянга орчим Монгол иргэн оршин сууж байна. Тус хотод суугаа консулын газраар сард мянга орчим Монгол иргэн үйлчлүүлдэг. Тиймээс ЦХХХЯ-ны Төрийн цахим үйлчилгээний зохицуулалтын газар иргэддээ төрийн үйлчилгээг ойртуулж, “Хурдан” цэгийг байгууллаа.
Ингэснээр тус хотын Монгол иргэд үйлчилгээний оператороос 440 орчим төрлийн төрийн үйлчилгээ, киоск машинаас 73 төрлийн үйлчилгээг цаг алдалгүй, хурдан, шуурхай авч эхэллээ.
Иргэд бичиг, баримт бүрдүүлэхдээ итгэмжлэх авах, Монгол руу хамаатан садандаа захих, шуудангаар авах гээд хугацаа их зарцуулдаг байсан бол одоо төрийн үйлчилгээний” Хурдан” цэг ойртож, амар, хялбар болсонд талархаж байгаагаа энэ үеэр илэрхийлж байлаа.
Монгол Улсад үйл ажиллагаа явуулж буй 63 их, дээд сургуулийн төлөөлөл 350 гаруй оюутныг хамруулсан “Student day” өдөрлөгийг өнөөдөр МУИС-д зохион байгуулав. Тус өдөрлөгт Монгол Улсын Ерөнхий сайд Л.Оюун-Эрдэнэ, Засгийн газрын зарим гишүүдийн хамт оролцож “Шинэ Сэргэлт-Шинэ Мянган” сэдвээр илтгэл тавилаа.
Монгол Улсын Их сургуулийн ашиглалтад ороод удаагүй байгаа “Багш, оюутны хөгжлийн төв”-ийн үйл ажиллагааг МУИС-ийн захирал Д.Бадарч Ерөнхий сайдад танилцуулсан юм. Мөн төрийн өмчит зургаан их сургуулийн захирал, удирдлагуудтай уулзаж, санал солилцсон.
Оюутнуудтай уулзахдаа Ерөнхий сайд оюутны хөгжлийн талаарх төр засгийн бодлого, ялангуяа, Засгийн газраас хэрэгжүүлж буй “Алсын хараа-2050” хөгжлийн хөтөлбөр, “Шинэ сэргэлтийн бодлого”-ын ач холбогдол, ковидын өмнөх болон дараах гадаад, дотоод хүчин зүйлс, Монгол Улсын нийгэм, эдийн засгийн өнөөгийн нөхцөл байдлыг танилцуулаад тэдний өмнө тулгамдаж буй асуудал бүрд чиглэсэн шийдлүүдийн хүрээнд сонирхсон асуултад нь хариулж, илэн далангүй ярилцав.
“Дэлхий даяар 1995 оноос хойш төрсөн Gen Z үеийнхэн буюу шинэ мянганы залуучуудын хандлага, сэтгэхүй, үзэл бодол хувьсан өөрчлөгдсөн энэ цаг үед Монгол Улсын хөгжлийг түүчээлэх, ирээдүйн боловсон хүчин болох залуу үеийнхний хүсэл, сонирхлыг байнга сонсож, тэдний дуу хоолойг төрийн бодлого, үйл ажиллагаандаа тусгахыг зорьдог хэмээн Ерөнхий сайд онцолсон. Тэрбээр, “1980 онд төрсөн залуу Ерөнхий сайдын хувьд шинэ үе, шинэ мянганы залуучууддаа гүүр нь байх болно” гэсэн юм.
Интернэт, техник, технологийн дэвшлүүдтэй хамт өсөж, торнисон учраас өнөөгийн оюутнууд буюу Gen Z, шинэ үеийн залуучуудын гол онцлог нь хүлээлтэд нийцэхгүй тохиолдолд дүгнэлт, шийдвэрийг маш хурдан гаргахаас гадна бизнес, брэндүүд, аливаа зүйлд өөрөө үнэнч байхаас илүү өөрт нь үнэнч байгаасай гэж хүсдэг тэмүүлэл өндөртэй болохыг олон судалгаа нотолсон байдаг. Тиймээс манай улсын тухайд ч ОЮУТНЫ ХӨГЖИЛ гэдэг ойлголт төрийн бодлого, сургалтын агуулга, сургуулийн орчин гээд бүх талд цогцоороо хөгжих шаардлагатай. Тэр дундаа “Шинэ сэргэлтийн бодлого”-ыг хэрэгжүүлэхэд ойрын жилүүдэд 39 мянган инженер шаардлагатай байгааг Ерөнхий сайд илтгэлдээ дурдсан.
Оюутнууд эрүүл мэндийн эрт илрүүлэгт хамрагдах, “Оюутан цэрэг”-т хамрагдах оюутны тоог нэмэгдүүлэх, автобусны хөнгөлөлтийн картын үнийг бууруулах, дотуур байрны хүртээмжийг нэмэгдүүлэх, боловсролын зээлийн сангийн үйл ажиллагааг нээлттэй болгох, оюутны хөдөлмөр эрхлэлтийг дэмжих зэрэг тулгамдаж буй 10 асуудлаа эрэмбэлж, Засгийн газраар шийдүүлэхийг хүссэн юм. Ерөнхий сайд Л.Оюун-Эрдэнэ эдгээр асуудал бүртэй холбоотой Засгийн газрын гишүүд, нийслэлийн Засаг дарга нарт үүрэг чиглэл өгч, заримыг нь газар дээр нь шийдвэрлэв. Тухайлбал, өдгөө төрийн 67 байгууллагын 747 үйлчилгээг нэг дор нэгтгээд байгаа “Е Mongolia” цонхонд “E student” цэсийг нэмж холбох байдлаар оюутнууд боловсрол, эрүүл мэнд, иргэний бүртгэл зэрэг төрийн бүх цахим үйлчилгээг гар утсаараа авах боломж тун удахгүй бүрдэнэ гэсэн юм. БШУ-ны сайд Л.Энх-Амгалан Засгийн газраас УИХ-д өргөн барьсан, хаврын чуулганаар хэлэлцэх гэж байгаа Боловсролын багц хуулийн шинэчлэлээр олон асуудал шийдэгдэнэ гэдгийг хэлээд улсын шалгалтын үеэр их, дээд сургуулийн номын санг 24 цагаар ажиллуулахыг төрийн өмчит зургаан сургуулийн захирлуудад үүрэг болгосон юм. Эрүүл мэндийн сайд С.Чинзориг эрүүл мэндийн даатгалгүй оюутнуудыг нэг удаа эрт илрүүлэг, үзлэг оношилгоонд хамруулах боломжтой гэж мэдэгдэв. Мөн оюутны хөдөлмөр эрхлэлтийг дэмжих эрх зүйн орчныг боловсронгуй болгох саналаа ирэх долоо хоногийн Засгийн газрын хуралдаанд танилцуулахыг Ерөнхий сайд холбогдох сайд нарт үүрэг болголоо.
Монгол Улсын Ерөнхий сайдын нэрэмжит 2023-2024 оны хичээлийн жилийн оюутны сургалтын тэтгэлэгт хөтөлбөрийг Ерөнхий сайд Л.Оюун-Эрдэнэ өнөөдрийн уулзалтын үеэр албан ёсоор зарласан. “Шинэ сэргэлтийн бодлого”-ыг хэрэгжүүлэхэд оролцох шилдэг мэргэжилтнүүдийг бэлтгэх зорилгоор Ерөнхий сайдын тэтгэлгийн хамрах хүрээ, хэмжээг өнөө жил нэмэгдүүлж, дотоодын их, дээд сургуулийн 2-3-р дамжааны 50 оюутанд тус бүр 10 сая төгрөгийн тэтгэлэг олгоно. Гадаадад суралцах магистр, докторын 50 хүртэл оюутанд төлбөрийг нь бүрэн хариуцна. Мөн Боловсролын зээлийн сангийн шугамаар тэтгэлэгт хөтөлбөрт тэнцсэн оюутнуудад зээл олгодог байсан бол Ерөнхий сайдын нэрэмжит тэтгэлэг энэ удаа буцалтгүй тусламж хэлбэрээр олгогдоно.
Орон даяар эхлүүлсэн уг тэтгэлэгт хөтөлбөрийг ирэх зургаадугаар сарын 02-ны өдрийг хүртэл зарласан бөгөөд нийт их, дээд сургуулийн оюутнуудыг идэвхтэй хамрагдахыг Ерөнхий сайд уриалав.
Монгол Улсын Ерөнхийлөгч Ухнаагийн Хүрэлсүх өнөөдөр Баян-Өлгий аймагт ажиллаж байна.
Монгол Улсын Ерөнхийлөгчийг Өлгий суманд хүрэлцэн ирэхэд Баян-Өлгий аймгийн Иргэдийн төлөөлөгчдийн хурлын дарга Ш.Хавыл, аймгийн Засаг даргын орлогч Х.Арман нар угтлаа.
Үүний дараа Монгол Улсын Ерөнхийлөгч, Зэвсэгт хүчний Ерөнхий командлагчийг Өлгий хотын М.Икей баатрын талбайд хүрэлцэн ирэхэд Баян-Өлгий аймгийн цэргийн хүрээний бие бүрэлдэхүүн жагсаж угтав.
Казах түмний Наурызын баярыг тохиолдуулан Монгол Улсын Ерөнхийлөгч Ухнаагийн Хүрэлсүх зарлиг гаргаж, эрхэлсэн ажил, салбартаа үр бүтээлтэй ажиллаж, улс орныхоо хөгжил дэвшилд бодитой хувь нэмэр оруулж буй хүмүүст төрийн дээд цол, одон, медаль гардууллаа.
Монгол Улсын Ерөнхийлөгч Ухнаагийн Хүрэлсүх Баян-Өлгий аймагт ажиллаж, “Наурыз-2023” баярын ёслолд оролцлоо.
“Монгол эх орныхоо дөрвөн зүг, найман зовхис болон гадаадын орнуудад амар тайван аж төрж, улс орныхоо хөгжил дэвшилд үнэтэй хувь нэмэр оруулж байгаа авьяас билигт, ажилч хичээнгүй казах түмэндээ Наурызын баярын мэндийг өргөн дэвшүүлье.
Илчит наран наашлан, өдөр шөнө тэнцдэг энэ өдрийг урган төлждөг цагийн эхэн, урин хавар айлчлан ирдэг хэмээн үзэж, казах түмэн Наурыз буюу “Шинэ өдрийн баяр” хэмээн хүндэтгэн ёсолж, хотол олноороо өргөн дэлгэр тэмдэглэж ирсэн сайхан түүхтэй билээ.
Наурыз баярыг 2009 онд ЮНЕСКО-гийн “Хүн төрөлхтний соёлын биет бус өвийн төлөөллийн жагсаалт”-д анх бүртгэсэн.
Мөн түүнчлэн 2010 онд НҮБ-ын Ерөнхий Ассамблейн 64 дүгээр хуралдаанаар Наурызын баярыг “Олон улсын баяр” хэмээн үзэх шийдвэр гаргасан нь энэхүү баярын утга учир, ач холбогдлыг улам бүр нэмэгдүүлж байна.
Манай казах түмэн хишиг буян, өлзий дэмбэрэлтэй бүхнийг жилийн эхнээс үүдэлтэй хэмээн үзэж, Наурызын баярын өглөө эртлэн босож, ургах нарандаа мэхийн ёсолж, тэнгэрийн өнгийг шинжиж, тэр жилийнхээ төлөв байдлыг тольдон ажиж, ажил үйлсээ тохируулан, ерөөл бэлгээ өргөж ирсэн өнө эртний уламжлалтай билээ.
“Санаа зөв бол заяа зөв” хэмээх монгол ардын сайхан үг бий.
Манай казах түмэн эрт үеэс Наурызын баярыг угтан айл өрх, хотол түмнээрээ ажил үйлсээ гүйцээж, буруу бүхнийг тэвчин, хуучин гомдлоо тайлж, сэтгэлээ ариусган, итгэлээ тэтгэж, гэр бүл, садан төрлөөрөө хол ойроос хуран цуглаж, учран золгодог сайхан уламжлалтай.
Өргөө гэрийнхээ хойморт өтөл буурал аксакалуудаа хүндэтгэн залж, мэргэн сургаалыг нь дээдлэн сонсож, улиран одож буй жилийнхээ ололт амжилтыг дүгнэн цэгнэж, угтан ирж буй жилдээ сайн сайхан бүхэн сэтгэлчлэн бүтэхийн ерөөл бэлгээ өргөдөг эртний сайхан заншилтай.
Энэхүү баярын өдөр казах түмэн маань морь уралдуулж, тулам булаалдаж, үе тэнгийн залуус хөгжилдөн наадаж, “Жороо хар” бүжгээ бүжин баярлаж, өв соёл, үүх түүхээрээ бахархдаг билээ.
Та бүхэн урин хавартай учран золгож буй баярын энэ өдрөө эдийн дээдээр гоёж, идээний дээжээ хүртэж, үгийн сайныг ерөөн хэлэлцэж, ахас ихсээ хүндлэн дээдэлж, өргөн олноороо цэнгэн наадаж, өв соёл, үнэт зүйлсээ үр хойчдоо өвлүүлэн үлдээж, заан сургаж буйг харахад сайхан байна.
Он цагийг өртөөлөн уламжилж ирсэн энэ сайхан баярын өдөр амжилт бүтээл, ажил үйлсээрээ түмэн олондоо хүндлэгдэж, төр улсдаа үнэлэгдэн Монгол төрийн эрхэм дээд шагнал хүртсэн алдартнууд Та бүхний дундаас олноороо төрөн гарсныг тэмдэглэн хэлэхэд таатай байна.
Та бүхний үе үеийн үлгэр дуурайл болсон алдар гавьяатнуудын бахдам түүх, бахархам амжилтыг залуу хойч үе залгамжлан үргэлжлүүлж, эх орон, ард түмэндээ эрдэм мэдлэг, ажил хөдөлмөрөөрөө онцгой хувь нэмэр оруулна гэдэгт Төрийн тэргүүн итгэл төгс байна.
Аялгуут домбороо эгшиглүүлж, амтат идээгээрээ дастарханаа дүүргэж, хөөр баяраар халгин цалгиж, “Үзэсгэлэн болгогч” хэмээх туулай жилийн Наурызын баяраа тэмдэглэж байгаа Та бүхэн хөх тэнгэрт халин дүүлэх хүрэн бүргэд шигээ хийморь золбоотой байж, ажил үйлс нь Алтай Таван богд шиг сүндэрлэн байхын өлзийтэй сайхан ерөөлийг өргөн дэвшүүлье.
Мөнх тэнгэрийн хүчин дор Монгол Улс мандан бадрах болтугай” гэлээ.
“Наурыз-2023” баярын ёслолд оролцогчид баярын парад, аймгийн Хөгжимт драмын театрын урлагийн тоглолтыг үзэж сонирхлоо.
Үүний дараа Монгол Улсын Ерөнхийлөгч Ухнаагийн Хүрэлсүх аймгийн өндөр настан, Монгол Улсын гавьяат эдийн засагч З.Ширханы гэрт зочлов.
Бизнес форумд банк, санхүүгийн байгууллага, эм, хүнс, технологийн компаниуд, уул уурхай, ноос, ноолуур, хүнсний үйлдвэрийн салбарт үйл ажиллагаа явуулж буй 40 гаруй компанийн төлөөлөгчид оролцож, хоёр орны худалдаа, эдийн засгийн хамтын ажиллагааны талаар мэдээлэл солилцож, эрдэс баялаг, цахим боловсрол, эрүүл мэнд, хүнсний хангамж болон аюулгүй байдлыг сайжруулах, аялал жуулчлалын салбарын хамтын ажиллагааг өргөжүүлэх, байгаль орчинд ээлтэй, ухаалаг хотыг хөгжүүлэхэд хамтран ажиллах боломжийн талаар ажил хэрэгч хэлэлцүүлэг өрнүүлэв. Уулзалтын үр дүнд Frequentes AG, eee Austria international projects GmbH, MUT Austria, ComFin Software GmbH компаниуд хамтарсан төсөл хэрэгжүүлэхээр тогтлоо.
Хувийн хэвшлээ дэмжсэн, бизнесийн хамтын ажиллагааг дэмжих нь МУ-ын Засгийн газрын бодлого байх бөгөөд тус төслүүдийг Монгол, Австри 2 орны Засгийн газар хоорондын комиссын даргын хувиар хуралдааны протоколд тусгахаар ажиллаж байна.
Монгол Улсын Ерөнхийлөгч, Зэвсэгт хүчний Ерөнхий командлагчийг тус ангийн байрлалд хүрэлцэн ирэхэд ангийн бие бүрэлдэхүүн жагсаж угтлаа.
Тус анги нь Баян-Өлгий аймгийн Мэргэжил сургалт, үйлдвэрлэлийн төвтэй хамтран хугацаат цэргийн алба хаагчдад мэргэжил олгох сургалтыг барилгын өргөн мэргэжил, хүнд машин, механизмын оператор, засварчин зэрэг чиглэлээр зохион байгуулсан байна.
Хугацаат цэргийн алба хаагчид бүтээн байгуулалтын ажилд оролцсоноор мөнгөн хуримтлал үүсгэхээс гадна мэргэжил эзэмшин халагдах давуу талтайг ангийн удирдлага танилцуулж байв.
Мөн “Тэрбум мод” үндэсний хөдөлгөөний хүрээнд ангийн байрлалд “Ногоон төгөл” хотхон байгуулахаар төлөвлөсөн бөгөөд таван нэр, төрлийн 2,150 ширхэг гоёлын болон жимсний мод, бутыг арчлан ургуулж байгааг ангийн захирагч, хурандаа У.Буянжаргал хэллээ.
Монгол Улсын Ерөнхийлөгч, Зэвсэгт хүчний Ерөнхий командлагч Зэвсэгт хүчний 340 дүгээр ангийн бие бүрэлдэхүүнд хандан хэлсэн үгийнхээ эхэнд Монгол Улсын Ерөнхийлөгч “Монгол цэргийн өдөр”, орчин цагийн Зэвсэгт хүчин үүсэн байгуулагдсаны 102 жилийн ойн баярын мэндийг дэвшүүлэв.
Сүүлийн жилүүдэд батлан хамгаалах салбар, Зэвсэгт хүчин бүтээн байгуулалтын үйлсэд манлайлан оролцож байгаа бөгөөд барилга-инженерийн 340 дүгээр анги нь байгуулагдаад удаагүй ч үүрэг гүйцэтгэх чадавхаа богино хугацаанд бүрдүүлж чадсаныг Зэвсэгт хүчний Ерөнхий командлагч тэмдэглэлээ.
Тухайлбал, Монгол Улсын эдийн засаг, орон нутгийн хөгжилд дорвитой дэмжлэг үзүүлэх стратегийн ач холбогдолтой “Асгат”-ын мөнгөний орд чиглэлийн зам гүүрний ажлыг богино хугацаанд, чанарын өндөр түвшинд хийж гүйцэтгэсэн нь улс орны бүтээн байгуулалтад төрийн цэргийн байгууллага оролцох эхлэлийг тавьж, Зэвсэгт хүчний нэр хүндийг өндөрт өргөсөн хэмээн онцлов.
Мөн монголчууд бид бие даан дэд бүтцийн том төслийг цогцоор нь гүйцэтгэж чаддаг гэдгийг батлан харуулсан “Тавантолгой-Зүүнбаян”, “Зүүнбаян-Ханги” чиглэлийн төмөр замыг барьж байгуулах төслийг хэрэгжүүлэхэд оролцсоныг дурдлаа.
Энх цагийн бүтээн байгуулалтад идэвхийлэн оролцохын зэрэгцээ ангийн үндсэн үүрэг болон хуулиар хүлээсэн бусад үүрэг гүйцэтгэх бэлэн байдал, цэргийн сургалт бэлтгэлдээ нэн тэргүүнд анхаарч ажиллах хэрэгтэйг санууллаа.
Монгол Улсын Зэвсэгт хүчний шинэ зууны түүхийн хуудсыг бичилцэж буй Зэвсэгт хүчний 340 дүгээр ангийн алба хаагчдын улс орноо батлан хамгаалах, бүтээн байгуулах их үйлсэд өндөр амжилт хүсэж, гэр бүлд нь эрүүл энх, аз жаргал, сайн сайхан бүхнийг хүсэн ерөөв.
Монгол Улсын Ерөнхийлөгч, Зэвсэгт хүчний Ерөнхий командлагчийг тус ангид ажиллах үеэр машин, техник гардууллаа.
Т.Даргерын хүү Д.Багдаулет нь Монгол Улсын Ерөнхийлөгчийн санаачилсан “Ерөнхийлөгчийн илгээлт-2100” тэтгэлэгт хөтөлбөрт шалгарч, ИБУИНХУ-ын Бристолын их сургуульд барилгын инженер мэргэжлээр элсэн суралцаж байгаа юм.
Д.Багдаулет нь Өлгий сумын Ерөнхий боловсролын 1 дүгээр сургуулийг 2021 онд төгссөн. Элсэлтийн ерөнхий шалгалтын математикийн төрөлд 758, англи хэлний төрөлд 800 оноог тус тус авч дундаж оноогоороо сум, аймгаа тэргүүлэн, улсын хэмжээнд 2 дугаар байрт жагссан амжилт үзүүлсэн. Мөн орон нутгаас англи хэлний шалгалтаар бүтэн оноо буюу 800 оноо авснаараа онцлогтой.
Монгол Улсын Ерөнхийлөгчийг Д.Багдаулетийн аав Т.Даргер, ээж Ш.Перизат болон гэр бүлийнхэн угтан мэндчилж, казах түмний Наурызын баярын мэндийг хүргэлээ.
Т.Даргер отгон хүү болох Д.Багдаулет нь өөрийн хүссэн мэргэжлээр олон улсын шилдэг их сургуульд элсэн суралцаж буйд баяртай байгаагаа хэлж, “Ерөнхийлөгчийн илгээлт-2100” хөтөлбөрийн ачаар олон хүүхэд, залуус гадаадын их, дээд сургуульд суралцах хүсэл мөрөөдлөө биелүүлэх боломжтой болсонд талархал илэрхийлэв.
Монгол Улсын нэрийг өндөрт өргөж, Монгол Улсын Ерөнхийлөгчийн гардуулсан төрийн далбааг ёс төртэй хадгалж, амжилттай суралцахыг хүүдээ захисан гэдгээ энэ үеэр хэлж байлаа.
Монгол Улсын Ерөнхийлөгч Ухнаагийн Хүрэлсүх “Ерөнхийлөгчийн илгээлт-2100” тэтгэлэгт хөтөлбөрт шалгарсан залуус хилийн чанадад өндөр боловсрол эзэмшин Монгол Улсын ирээдүйд үнэ цэнтэй боловсон хүчнийг бүрдүүлнэ гэдгийг онцлов.
Тухайлбал, Д.Багдаулет нь ИБУИНХУ-д суралцан төгсөж ирээд төрөлх нутаг, эх орныхоо хөгжилд өөрийн хувь нэмрийг оруулж, их үйлсийг бүтээнэ гэдэгт итгэлтэй байгаагаа хэлж, “Ерөнхийлөгчийн илгээлт-2100” хөтөлбөрт шалгарсан залуусыг үргэлж дэмжинэ гэлээ.
Монгол Улсын Ерөнхийлөгч монгол хүний дэлхийд өрсөлдөх чадварыг нэмэгдүүлэх, хүүхэд, залуучуудын суралцах тэгш боломжийг хангах, дэлхийн шилдэг их, дээд сургуульд суралцахад дэмжлэг үзүүлэх зорилгоор зарлиг гаргасан.
Энэ дагуу жил бүр 330 сум, нийслэлийн хороодоос тус бүр нэг шилдэг сурагчийг шалгаруулж, дэлхийн шилдэг их, дээд сургуульд суралцуулах “Ерөнхийлөгчийн илгээлт-2100” тэтгэлэгт хөтөлбөрийг 2021 оноос хэрэгжүүлж байна.
Харьяалагдах сум, хорооныхоо хамран сургах тойргийн сургуульд сүүлийн гурваас багагүй жил суралцан төгссөн, математик болон гадаад хэлний Элсэлтийн ерөнхий шалгалтын онооны дунджаар сум, хороондоо тэргүүлсэн суралцагч хөтөлбөрт хамрагдах боломжтой.
“Ерөнхийлөгчийн илгээлт-2100” хөтөлбөрийн хүрээнд ИБУИНХУ-д 29 монгол оюутан, дэлхийн шилдэг 100 их сургуулийн нэг Бристолын их сургуульд 15 монгол оюутан суралцаж байна.
Энэ үеэрээ Баян-Өлгий аймгийн Нэгдсэн эмнэлгийн барилга, хүүхдийн эмнэлэг, 250 хүүхдийн цэцэрлэг, Ховд голын төмөр бетон гүүрийг авто замынх нь хамт, Төрийн үйлчилгээний нэгдсэн байр, Цагааннуур – Улаанбайшинт чиглэлийн авто зам, Өлгий сумын үерээс хамгаалах далан барих зэрэг асуудлыг шийдвэрлэсэн юм.
Эдгээр бүтээн байгуулалтын ажлууд амжилттай хэрэгжсэн гэдгийг Монгол Улсын Ерөнхийлөгчийг өнөөдөр Баян-Өлгий аймагт ажиллах үеэр танилцуулав.
Тухайлбал, 50 ортой хүүхдийн эмнэлгийн шинэ барилга 2020 оны 12 дугаар сард ашиглалтад оржээ. Ингэснээр тус эмнэлгийн үйлчилгээний хүртээмж нэмэгдэж, өнгөрсөн онд 2,600 хүүхэд хэвтэн эмчлүүлсэн байна.
Харин одоо баригдаж буй Нэгдсэн эмнэлгийн шинэ барилга нь хэвтэн эмчлүүлэх тасаг, амбулатори, эмгэг судлалын тасаг гэсэн гурван хэсгээс бүрдэж байгаа юм.
Тус барилгын ажлын явцыг түргэтгэх, мөн нэн шаардлагатай зарим тоног төхөөрөмж, туулах чадвар сайтай алсын дуудлагын машин зэргийг нийлүүлэх хэрэгцээ байгааг Нэгдсэн эмнэлгийн дарга Х.Манчук энэ үеэр хэлж байлаа.
Шинэ барилга ашиглалтад орсноор Баян-Өлгий аймгийн Нэгдсэн эмнэлгийн хүчин чадал хоёр дахин нэмэгдэж, аймгийн нийт хүн амд үзүүлэх эрүүл мэндийн тусламж, үйлчилгээний чанар, хүртээмж сайжирна гэдгийг эмнэлгийн удирдлагууд онцолж байв.
Монгол Улсын Ерөнхийлөгчийг Баян-Өлгий аймагт дагалдан ажиллаж буй Монгол Улсын сайд, Засгийн газрын Хэрэг эрхлэх газрын дарга Д.Амарбаясгалан тус эмнэлгийн барилгын ажилд шаардлагатай санхүүжилтийг шийдвэрлэж, барилгыг ашиглалтад оруулахад Засгийн газрын зүгээс анхаарал хандуулж ажиллана гэдгийг энэ үеэр хэлэв.
Монгол Улсын Ерөнхийлөгчийг тус эмнэлэгт ажиллах үеэр орчин үеийн, өндөр хүчин чадалтай хэв авиан оношилгооны төхөөрөмж, хүүхдийн тасагт хүчилтөрөгч өтгөрүүлэгч тоног төхөөрөмжийг хүлээлгэн өглөө.
Баян-Өлгий аймгийн Нэгдсэн эмнэлэг нь 2022 онд 182,050 удаагийн амбулаторийн үзлэг хийж, 18,087 хүнд урьдчилан сэргийлэх үзлэгийн үйлчилгээ үзүүлжээ.
Тус эмнэлэг нь 1940 онд байгуулагдсан бөгөөд өдгөө 422 ор, 22 тасаг, нэгж, 472 эмч, мэргэжилтэнтэйгээр үйл ажиллагаа явуулж байна.
Бүгд Найрамдах Энэтхэг Улсаас Монгол Улсад Суугаа Онц бөгөөд Бүрэн Эрхт Элчин сайд М.П.Сингх Монгол Улын Хүний эрхийн Комиссын дарга Ж.Хунанг 2023 оны 03 дугаар сарын 22-ны өдөр хүлээн авч уулзлаа.
Уулзалтаар ХЭҮК-оос хүний эрхийн хамгаалах чиглэлээр хэрэгжүүлж буй ажил, шинэ санаачилгын талаар танилцуулж, Монгол, Энэтхэг улсад харилцан оршин сууж буй иргэдийн эрхийг хангаж, хамгаалах чиглэлээр эрх зүйн туслалцаа үзүүлэх, хоёр орны Хүний эрхийн Үндэсний байгууллагууд Монгол-Энэтхэгийн Элчин сайдын яам болон Гадаад харилцааны яам, Хуульчдын холбоотой хамтран ажиллах асуудлаар санал солилцлоо.
Түүнчлэн Элчин сайдын яамны албан хаагчдын хүний эрхийн мэдлэг, ойлголтыг нэмэгдүүлэх сургалтад хамруулахаар харилцан тохиролцов.
© Copyright 2022, Зохиогчийн эрхээр хамгаалагдсан | nlive.mn
