Nlive.mn

Засгийн газрын ээлжит хуралдаан 2022 оны гуравдугаар сарын 23-нд болж, дараах асуудлуудыг хэлэлцэн шийдвэрлэлээ.

Нөөцийн махыг энэ сарын 25-наас худалдан борлуулна

Нийслэлийн хүн амын хаврын улирлын хүнсний хэрэгцээнд зориулан бэлтгэсэн махыг энэ сарын 25-ны өдрөөс эхлэн худалдан борлуулна. Нөөцийн махны нийлүүлэлт, түгээлт, борлуулалтын үе шатанд чанар, аюулгүй байдлын хяналт тавьж ажиллахыг холбогдох хүмүүст үүрэг болголоо. Үхрийн ястай мах 8900 төг/кг, хониных 8300 төг/кг, ямааных 7100 төг/кг үнээр есөн дүүргийн 468 хүнсний дэлгүүрээр худалдаалахаас гадна аж ахуйн нэгжийн үйл ажиллагааны зардлын зөрүүг нөөцийн махны борлуулалтын татварын цахим төлбөрийн баримтын системд үндэслэн олгох юм байна.
Эрүүл мэндээ хамгаалж, эдийн засгаа сэргээх 10 их наядын цогц төлөвлөгөөний хүрээнд нийслэлийн хүн амын хаврын улирлын хүнсний хэрэгцээнд зориулан махны нөөц бүрдүүлэх арга хэмжээг арилжааны банкны эх үүсвэрээр хэрэгжүүлэхээр шийдвэрлэж, 23 аж ахуйн нэгж нийт 12,6 мянган тонн махны нөөц бүрдүүлжээ.

Насанд хүрэгчид 19, хүүхдүүд зургаан төрлийн үзлэг оношилгоонд хамрагдана

Хүн амыг нас, хүйс, эрүүл мэндийн эрсдэлд суурилсан зонхилон тохиолдох халдварт болон халдварт бус өвчнөөс урьдчилан сэргийлэх эрт илрүүлэх үзлэг, шинжилгээ, оношилгоонд хамруулах ажлыг энэ оны тавдугаар сарын 1-нээс орон даяар зохион байгуулах бэлтгэл ажлын талаар Эрүүл мэндийн сайд С.Энхболд Засгийн газрын хуралдаанд мэдээлэл хийлээ.
Насанд хүрэгчид 19 төрлийн үзлэг, шинжилгээ, оношилгоонд хамрагдана. Тухайлбал, зүрх судасны өвчин, чихрийн шижин, сүрьеэ, сэтгэцийн эрүүл мэндийн эрсдэлийн үнэлгээ, эмнэл зүйн үзлэгээр: эрүүл мэнд, бие бялдрын үнэлгээ, артерын даралт хэмжих”, лабораторийн шинжилгээгээр: биохими, цус болон шээсний ерөнхий шинжилгээ, глюкоз, ПАП сорил”, гепатит B,C, тэмбүү, ХДХВ илрүүлэх хурдавчилсан сорил, багажийн шинжилгээгээр: зүрхний цахилгаан бичлэг, улаанхоолой, ходоодны дуран, цээжний рентген шинжилгээ, хөх, хэвлийн, бамбайн хэт авиан шинжилгээ хийхээр товложээ.
Харин 18 хүртэлх насны хүүхэд зургаан төрлийн үзлэг, шинжилгээ, оношилгоонд хамрагдана. Тухайлбал, халдварт бус өвчин болон сэтгэцийн эрүүл мэндийн эрсдэлийн үнэлгээ, эмнэл зүйн үзлэгээр: амны хөндий, нүдний үзлэг, сүрьеэгийн үзлэг хийнэ.
Эрт илрүүлэх үзлэг, шинжилгээ, оношилгоог зохион байгуулснаар ДЭМБ-ын тооцооллоор хорт хавдрын өвчлөлтэй холбоотой нас баралтыг 35-69 хувь бууруулна гэжээ. Өвдсөн нэг хүний эмчилгээнд 11,2-12,3 сая төгрөг зарцуулж байсан бол эрт илрүүлэх үзлэг, шинжилгээ, оношилгоонд иргэн бүрийг жилд нэг удаа бүрэн хамруулснаар нэг хүнд 150 мянган төгрөг зарцуулж, эдийн засгийн хувьд хэмнэлт бий болох тооцооллыг хийжээ.
Эрүүл мэндийн сайдын танилцуулгатай холбогдуулан хүн амыг урьдчилан сэргийлэх, эрт илрүүлэх үзлэг, шинжилгээ, оношилгоонд хамруулах үйл ажиллагаанд бусад салбарын оролцоог хангаж ажиллахыг Ерөнхий сайд үүрэг болголоо.

Дэлхийн эрүүл мэндийн байгууллага /ДЭМБ/-аас жил бүрийн гуравдугаар сарын 24-нийг “Сүрьеэтэй тэмцэх дэлхийн өдөр” болгон зарласан. 2022 онд тус өдрийг “Сүрьеэгүй ирээдүйн төлөө хөрөнгө оруулалтыг нэмэгдүүлье” уриан дор тэмдэглэн өнгөрүүлэх гэж байна. Энэ хүрээнд ХӨСҮТ, НЗДТГ, НЭМГ, НЭМҮТ, дүүргийн эрүүл мэндийн төвийн сүрьеэгийн диспансерийн хамт олон болон төрийн бус байгууллагууд хамтран маргааш Сүхбаатарын талбайд нээлттэй өдөрлөгийг 11.00-13.00 цагийн хооронд зохион байгуулна. Энэ үеэр сүрьеэ өвчний талаар сургалт, сурталчилгаа хийхээс гадна эмнэл зүйн асуумж авч, урьдчилан сэргийлэх үзлэг хийж, шаардлагатай хүмүүсийн рентген зургийг авах юм. Мөн хүүхдүүдийн дунд гар зургийн уралдаан зохион байгуулна.

Манай улс нь сүрьеэгийн тархалт өндөртэй орны нэг бөгөөд жилд 3000 гаруй хүн сүрьеэгээр өвчилдөг. Үүний 12 хувь нь хүүхдүүд байна. Хүүхэд, залуучуудын дунд сүрьеэгийн өвчлөл өндөр байгаа нь нийгэмд сүрьеэгийн халдварлалт идэвхтэй байгааг харуулж байна. Манай улсад жил бүр бүртгэгдэж буй сүрьеэгийн өвчлөлийн 60 гаруй хувь нь Улаанбаатар хотод гарч, өвчлөлийн 70 орчим хувийг 15-44 насны өсвөр үеийн болон ид ажил хөдөлмөрийн насны залуучууд эзэлж байна.

• Сүрьеэ нь дэлхийд нас баралтаар тэргүүлэх халдварт өвчлөлөөс хоёрдугаарт орж байна.
• Өдөр бүр 4000 гаруй хүн сүрьеэ өвчний улмаас амиа алдаж, урьдчилан сэргийлэх, эмчлэх боломжтой энэхүү өвчнөөр 30.000 орчим хүн өвчилж байна.
• 2000 оноос хойш 66 сая хүний ​​амийг аварсан боловч ахиц дэвшил удаашралтай байгаа бөгөөд сүрьеэ өвчний тархалтыг таслан зогсооход шаардлагатай арга хэмжээ, хөрөнгө оруулалт хангалтгүй байна.
• 2018-2020 онд сүрьеэ өвчний эмчилгээнд 20 сая хүн хамрагдсан нь 2018-2022 онд эмчилгээнд хамрагдсан хүний тоог 40 саяд хүргэх таван жилийн зорилтын 50 хувь нь юм. Мөн хугацаанд 8.7 сая хүнд сүрьеэ өвчнөөс урьдчилан сэргийлэх эмчилгээ хийсэн байна. Энэ нь 2018-2022 онд 30 саяд хүрэх зорилтын 29 хувь юм. Харин 2022 оны зорилтод хүрэхийн тулд улс орнууд КОВИД-19 тахлын улмаас тасалдсан сүрьеэгийн тусламж үйлчилгээний хүртээмжийг яаралтай сэргээж, цаашид илүү ахиц дэвшил гаргах шаардлагатай байна.

Сүрьеэ нь Mycobacterium tuberculosis хэмээх нянгаар үүсгэгддэг амьсгалын замын халдварт өвчин юм. Нян нь ихэвчлэн уушгийг гэмтээдэг. Гэхдээ сүрьеэгийн нян бөөр, нуруу, тархи зэрэг биеийн аль ч хэсгийг гэмтээж болдог. Хэрэв эмчилгээ хийлгэхгүй бол сүрьеэ өвчин үхэлд хүргэх аюултай байдаг. Харин эмчийн зааврын дагуу эмчилгээ бүрэн хийлгэсэн үед  эдгэрдэг өвчин юм.

Эрүүл мэндийн сайд С.Энхболд Дархан-Уул аймагт ажиллаж Эрүүл мэндийн дэмжих төвийн нээлтийн үйл ажиллагаанд оролцов. Тус төв нь хүн амыг зонхилон тохиолдох халдварт болон халдварт бус өвчнөөс урьдчилан сэргийлэх, эрт илрүүлэх үзлэг, шинжилгээ, оношилгоонд хамруулах юм.

Эрүүл мэндийн дэмжих төвд улсын төсвийн 1850.0 сая төгрөгийн хөрөнгө оруулалтаар иж бүрэн засвар үйлчилгээг хийж ЧХХ-н үзлэг, эмчилгээ, Чих хамар хоолойн үзлэгийн дуран, Тимпанаметр, Аудиометр,Спирометр,Биеийн бүтэц тодорхойлох аппарат,Автомат жин (өндөр хэмжигчтэй),Ясны сийрэгжилт үзэх аппарат,Тархины доплер,Ачаалалтай зүрхний цахилгаан бичлэгийн аппарат,Зүрхний цахилгаан бичлэгийн аппарат, Нүдний хараа шалгах таблиц,Слит ламп, Авторефракто /кератометр аппарат/,Суурин ЭХО аппарат Зөөврийн ЭХО аппарат Уян дуран,Шүдний кресло,Автоклав,Ломбоны гэрэл,Шүдний рентген аппарат /зөөврийн/,Шүдний чулуу өнгөр цэвэрлэх чичиргээт машин, Шүлс соруулах, зөөврийн аппарат, соруулагчийн гар зэрэг тоног төхөөрөмжүүдийг ашиглалтад оруулахад бэлэн болоод байна.

Эрүүл мэндийн газар байрлах “Эрүүл мэндийн дэмжих төв”-д нийт 34 нэр төрлийн 95 ширхэг 796.1 сая төгрөгийн тавилга, тоног төхөөрөмж хүлээн авч суурилуулсан. Тус төвд Рентген зураг, Биеийн бүтэц тодорхойлох,Шүд,Яс сийрэгжилт,,Хоол зүй,,Дуран,Зүрхний бичлэг,Тархины бичлэг, ЭХО,Чих,хамар хоолой, Арьс харшлын үзлэг тус тус хийгдэнэ.

Засгийн газрын өнөөдрийн ээлжит хуралдаанаар, Хөтөлийн цементийн үйлдвэрийг хувьчилсан шийдвэрийг хүчингүй болгох тухай тогтоол баталсан тухай ЗГХЭГ-ын дарга Ц.Нямдорж мэдээлэв. 

Тус үйлдвэрийг 2011 онд 10 жилийн хугацаатай концессын гэрээгээр Бейзмэнт ХХК-д шилжүүлсэн бөгөөд 2021 онд гэрээний хугацаа дуусах байв. Гэвч 2015 онд тус үйлдвэрийг өртэй нь хувьчлах шийдвэр гарсан байна. 

ЗГХЭГ-ын дарга Ц.Нямдорж, “Өнөөдөр тус үйлдвэр бараг эзэнгүй болсон. 2011 онд концессын гэрээ байгуулах үед Бейзмэнт ХХК гэрээ байгуулсан. Харин 2015 оны 10 дугаар сард хувьчилсны дараа Бейзмэнт ХХК татан буугдаж Хөтөл гэдэг нэр авсан. Энэ нэрийг 2008 онд нэг хүн авчихаад хадгалж байсан юм билээ. Хувьчлалын дараа Бейзмэнт ХХК компанийн нэрээ сольж Хөтөл болгосон. Хувьчилж авсан сүүлийн хүн нь нас барсан бөгөөд өв залгамжлагчид нь авахаас татгалзсан. Ингээд өнөөдрийн байдлаар бараг эзэнгүй компани болж хувирсан. Хуулийн байгууллага эл асуудлыг шалгаж байгаа. Хувьчлал явуулах үед хууль зөрчсөн, хувьчлалын дараа ч гэрээний үүргээ биелүүлээгүй байна” хэмээв.

Тус үйлдвэрийг хувьчилсан Засгийн газрын 2015 оны тогтоолыг хүчингүй болгосноор, Төрийн өмчийн бодлого, зохицуулалтын газар үйлдвэрийг хариуцах юм байна.

Энэ компани 5 сая ам.долларын зээлтэй байсан бөгөөд Хөгжлийн банкнаас авсан 61 сая ам.долларыг шууд өмнөх зээлд нь шилжүүлж дуусгасан гэдгийг ЗГХЭГ-ын дарга Ц.Нямдорж мэдээллээ.

Эх сурвалж:/МОНЦАМЭ/