Монгол Улсын Шадар сайд С.Амарсайханаар ахлуулсан Газрын шинэтгэлийн үндэсний хороо хуралдлаа.
Энэ удаагийн хуралдаанаар Газрын шинэтгэлийн Үндэсний хорооны 2021 оны үйл ажиллагааны тайлан, 2022 онд хэрэгжүүлэх ажлын төлөвлөгөөг хэлэлцсэн юм. Мөн Монгол Улсын иргэнд 2022 онд өмчлүүлэх газрын нийт хэмжээ, байршил, зориулалтыг тогтоох тухай Засгийн газрын тогтоолын төсөл болон Хаягийн мэдээллийн нэгдсэн системийг хэрэглээнд нэвтрүүлэх тухай асуудлуудыг хэлэлцлээ.
Өнгөрсөн онд тус хорооны төлөвлөж хийсэн ажлын хүрээнд газрын харилцаа, хот зохион байгуулалтын үйлчилгээг цахим хэлбэрт шилжүүлэх талаар онцгой анхаарч ажилласан талаар тус хорооны нарийн бичгийн дарга А.Энхманлай хэллээ. Уг ажлын дүнд иргэд газрын харилцаатай холбоотой 36 үйлчилгээг цахимаар авч эхэлсэн бөгөөд 600 гаруй сая төгрөгийг бодитоор хэмнэсэн судалгаа гарчээ. Уг ажлыг цаашид өргөжүүлэхэд хууль, тогтоомжид өөрчлөлт оруулах хэрэгтэй байгааг Шадар сайдад уламжиллаа.

Мөн 2013 онд Хаягжуулалтын тухай хууль батлагдсантай холбоотойгоор улс орон даяар мэдээллийн сан үүсгээд буй. Уг санд 21 аймгийн 330 сум, нийслэлийн есөн дүүргийн бүх хашаа, байшинг, бүртгэлжүүлсэн байна. Түүнчлэн орон нутгийн өвөлжөө, хаваржаа, рашаан сувилал, замын тэмдэг зэрэг бүх хэсгийг хамруулан, нэр өгч хаягжуулжээ. Уг хаягжуулсан газруудад 2014 онд баталсан Монгол Улсын стандартын дагуу тэмдэг тэмдэглэгээ тавих ажлыг эхлүүлэн, одоогоор 220 сумд хэрэгжүүлээд буй аж. Цаашид хаягийн мэдээллийн нэгдсэн системийг хэрэглээнд нэвтрүүлэх ажлыг эрчимжүүлэхийг Шадар сайд үүрэг болголоо.
Түүнчлэн Газрын шинэтгэлийг эрчимжүүлэх хүрээнд ажил үйлчилгээнд гарч буй асуудлуудыг цаг алдалгүй шуурхай шийдвэрлэж байх зорилгоор бүрэлдэхүүнийг өргөжүүлж, Газрын шинэтгэлийн Үндэсний хорооны хуралдааныг 14 хоног тутам зохион байгуулахыг Шадар сайд С.Амарсайхан үүрэг болголоо.
Мөн дараагийн хуралдаанаар 2022 онд хэрэгжүүлэх ажлын төлөвлөгөө, Газрын багц хуулийн төслүүд, Хаягийн мэдээллийн нэгдсэн системийг хэрэглээнд нэвтрүүлэх зэрэг асуудлуудыг дахин хэлэлцэхээр тогтсон юм.

Монгол Улсын Шадар сайд С.Амарсайхан Хүний эрхийн үндэсний комиссын гишүүдийг хүлээн авч уулзлаа.
Хүний эрхийн Үндэсний комисс нь УОК-той мэдээлэл солилцох, зөвлөн туслах хэлбэрээр хамтран ажилладаг бөгөөд цар тахлын үед 53 байгууллагад шалгалт хийж, хүний эрхийн зөрчлөөс урьдчилан сэргийлэх зөвлөмж, зөвлөгөө өгч ажилласан байна.
Хэдийгээр цар тахлын нөхцөл байдал намжиж, Шар түвшинд шилжсэн ч уялдаа холбоотой ажиллах нь зүйтэй гэдгийг Хүний эрхийн үндэсний комиссын гишүүд хэллээ.
УОК-ын зүгээс ч Хүний эрхийн үндэсний комиссын гишүүдтэй цаашид сар бүр уулзалт зохион байгуулж, мэдээлэл солилцож байх нь зүйтэй гэдэг байр суурийг илэрхийлж, энэ асуудлаар хэлэлцэн тогтлоо.

Бээжингийн өвлийн паралимпын наадам ирэх гуравдугаар сарын 4-13-ны өдрүүдэд болно.

Энэ удаагын өвлийн паралимпын наадамд түүхэндээ хамгийн өргөн буюу 96 тамирчны бүрэлдэхүүнтэйгээр оролцоно.

Хятад улсын хувьд өвлийн паралимпын наадамд зургаа дахь удаагаа оролцох бөгөөд энэ удаагийн бүрэлдэхүүнд 68 эрэгтэй, 28 эмэгтэй тамирчин багтжээ. Тэдний дундаж нас 25 байна.

Түүнээс хамгийн ахмад нь 45 настай уулын цаначин Жан Хайюань бол хамгийн залуу нь 17 настай сноубордын тамирчин Гэн Яньхун юм. Мөн нийт тамирчдын 85 нь анхны паралимпын наадамдаа оролцох ажээ.

Хятадын тамирчид спортын үндсэн бүх зургаан төрлийн 73 тэмцээнд хурд хүчээ сорин өрсөлдөнө. “Сочи-2014” өвлийн паралимпод Хятадын баг спортын хоёр төрлийн зургаан тэмцээнд оролцож байв.

ОХУ-ын Ерөнхийлөгч Владимир Путин Кремльд болсон ёслолын үеэр Бүгд Найрамдах Донецк Ард Улс, Бүгд Найрамдах Луганск Ард Улсыг хүлээн зөвшөөрөх тухай зарлигт гарын үсэг зурлаа.

Тэрбээр телевизээр иргэддээ хандан “Удаан хугацааны хоцрогдсон шийдвэрийг гаргах шаардлагатай гэж би үзэж байна. Би Бүгд Найрамдах Донецк Ард Улс, Бүгд Найрамдах Луганск Ард Улсын тусгаар тогтнол, бүрэн эрхт байдлыг даруй хүлээн зөвшөөрч байна” гэж тайлбарлажээ.

Владимир Путин энэ шийдвэрийг зарлахдаа Оросын иргэд болон тус улсын бүх эх оронч хүчнүүд дэмжинэ гэдэгт итгэлтэй байгаагаа илэрхийлжээ.

Мөн даваа гарагт болсон Оросын Аюулгүйн Зөвлөлийн яаралтай хуралдааны үеэр Владимир Путин “Украины засгийн газрын цэргүүд гал зогсоох хэлэлцээрийг зөрчиж, Донецк, Луганск мужуудад цохилтоо үргэлжлүүлсээр байна” гэж мэдэгдсэн байна.  Мөн Украин Умард Атлантын эвсэлд нэгдвэл ОХУ-д илүү их аюул заналхийлнэ” мэдэгджээ.

Дараа нь ОХУ-ын Ерөнхийлөгч Бүгд Найрамдах Донецк Ард Улсын удирдагч Денис Пушилин, Бүгд Найрамдах Луганск Ард Улсын удирдагч Леонид Пасечник нартай уулзаж, ОХУ болон хоёр бүгд найрамдах улсын найрамдал, хамтын ажиллагаа, харилцан туслалцааны тухай гэрээнд гарын үсэг зурсан байна.

Ёслолын ажиллагаа ОХУ-ын Аюулгүйн зөвлөлийн хуралдааныг зохион байгуулсан Кремлийн Гэгээн Кэтрин танхимд болжээ. ОХУ-ын Ерөнхийлөгч Владимир Путиний энэ мэдэгдлийн дараа Цагаан ордны албаныхан даваа гарагт Украины зүүн хэсгийн салан тусгаарлагч хоёр бүс нутагт хориг арга хэмжээ авахаа мэдэгдэв.

Ерөнхийлөгч Жой Байден Украины Ерөнхийлөгч Владимир Зеленскийтэй утсаар ярьсан байна. Ерөнхийлөгч Жое Байден Донецк, Луганск мужуудад шинээр хөрөнгө оруулахыг хориглосон захирамж гаргана гэж мэдэгджээ.

Их Британийн Ерөнхий сайд Борис Жонсон тус бүс нутгийг хүлээн зөвшөөрсөн нь Украины тусгаар тогтнол, бүрэн бүтэн байдлыг бүдүүлгээр зөрчиж байна хэмээн буруутгажээ. Мөн Европын Комиссын Ерөнхийлөгч Урсула Фон Дер Лейен мэдэгдэл гаргаж, Европын холбоо “хууль бус үйлдэл”-д оролцсон хүмүүст хориг арга хэмжээ авна гэж мэдэгдлээ.

 Австрали өнөөдрөөс эхлэн коронавирусний вакцины бүрэн тунд хамрагдсан гадаадын жуулчдад хилээ бүрэн нээж байна.

Тус улс нь коронавирусний халдварын тархалтыг хязгаарлах зорилгоор 2020 оны 3 дугаар сараас эхлэн өдийг хүртэлх хугацаанд хилээ хаагаад байсан юм.

Даваа гарагт Австралид олон улсын зорчигч тээврийн 50 гаруй нислэг ирэхээс 27 нь тус улсын хамгийн том хот болох Сиднейд буужээ. Үүнтэй холбоотойгоор Австралийн Гадаад хэргийн сайд Дан Техан өөрийн биеэр Сиднейн олон улсын нисэх онгоцны буудалд очиж, гадаадын жуулчдыг угтан авч, чихмэл тоглоом, цэцэг зэргийг бэлэглэжээ.

Тэрбээр хэлэхдээ, “Qantas Airlines” компани энэ долоо хоногтоо 14 мянга гаруй гадаадын жуулчдыг Австралид авчрах төлөвтэй байгаа бөгөөд манай улсын аялал жуулчлалын салбар “маш эрчимтэй” сэргэх болно гэв.

Аялал жуулчлалын салбар нь тус улсын хамгийн томд тооцогдох салбаруудын нэг бөгөөд жилдээ 60 тэрбум австрали долларын эдийн засгийн үр ашгийг авч ирдэг байна. Мөн тус улсын ажиллах хүчний 5 орчим хувь нь аялал жуулчлалын салбарт ажилдаг ажээ.

КАНБЕРРА. /Reuters/

Украины умард хилийн ойролцоо үргэлжилж буй Орос, Беларусийн цэргийн хамтарсан сургуулилалт Ням гарагт өндөрлөх ёстой байсан ч тодорхойгүй хугацаагаар сунгах болсныг талууд мэдээлжээ.

Уг шийдвэр нь хоёр улсын хилийн орчимд гадаадын цэргийн ажиллагаа идэвхжиж буйтай холбоотой хэмээн Минскийн эрх баригчид тайлбарласан байна.

Хоёр талаас олон мянган цэрэг оролцсон “Союзная решимость” нэртэй хамтарсан сургуулилалт хоёрдугаар сарын 10-ны өдөр эхэлж байжээ.

Өрнөдийн орнууд уг сургуулилалтыг ОХУ-ын цэрэг Украинд халдах төлөвлөгөөний нэг хэсэг гэж үзэж байгаа.

“Нэгдсэн Улсын хилийн орчим гадаадын цэргийн ажиллагаа эрчимжиж байгаа, Донбасын нөхцөл байдал муудаж байгаа шалтгаануудын улмаас Беларусь, Оросын ерөнхийлөгч нар зэвсэгт хүчнийхээ байлдааны бэлэн байдлыг үргэлжлүүлэн шалгахаар шийдлээ” гэж Беларусийн батлан хамгаалахын сайд Виктор Хренин мэдэгджээ.

Нэгдсэн Улс гэдэг ойлголт нь эдийн засаг, батлан хамгаалах салбаруудаа интеграцчилах Орос, Беларусийн хамтын ажиллагааны хэлбэр юм.

Өнгөрсөн долоо хоногийн сүүлээс эхлэн Украинаас салан тусгаарлаад буй Донбасын бүс нутагт байлдааны ажиллагаа эрчимжсэн юм. Үүнд Украины зэвсэгт хүчин болон Оросын дэмжлэгтэй салан тусгаарлагчид харилцан нэг нэгнээ буруутгасаар байна.

Эх сурвалж: Russia Today, Associated Press