Цогтцэций сумын төвөөс урагш чиглэсэн 1,1км хатуу хучилттай авто зам ашиглалтад орлоо
“Эрдэнэс Тавантолгой хөгжлийг дэмжих сан”-ийн хөрөнгө оруулалтаар баригдсан Цогтцэций сумын төвөөс урагш чиглэсэн 1,1км хатуу хучилттай авто зам, гэрэлтүүлэг, явган болон дугуйн зам, зогсоолын хамт ашиглалтад орлоо.
Уг зам нь Цогтцэций сумын төвөөс Гашуунсухайтын хатуу хучилттай замруу гарах чиглэлд тавигдсанаараа сумын төвийн тоосжилтыг бууруулж, хөндлөн огтлолын бусад хатуу хучилттай замуудтай холбогдон сумын төвийн баруун хэсгийн босоо чиглэлийн төв зам болж байна. #ЭТТ #СайнМэдээнийУурхай
“Таван толгой түлш” ХХК Баруун үйлдвэрт БОАЖ-ын сайд Б.Бат-Эрдэнэ ажиллав
Өвөлжилтийн бэлтгэл хангах хүрээнд “Таван толгой түлш” ХХК Баруун үйлдвэр дээр БОАЖ-н сайд Б.Бат-Эрдэнэ ажиллаж байна.
2022 оны наймдугаар сарын 11 ний өдрийн байдлаар 70000 тн сайжруулсан шахмал түлшний нөөц бүрдүүлж 100000 тн мидлингийг нөөцлөөд байна.
Мидлинг татан авалтыг төмөр замаар тээвэрлэх ажлын бэлтгэл ажил хангагдаж байгаа бөгөөд ирэх сарын дундаас эхлэн төмөр замаар тээвэрлэн шууд үйлдвэрийн хашаанд буулгах юм.
Сайжруулсан шахмал түлш борлуулах хүсэлтэй иргэдийг бүртгэж эхэллээ
Сайжруулсан шахмал түлш борлуулах хүсэлтэй иргэдийг өнөөдрөөс бүртгэж эхэллээ.
Тавантолгой түлш ХХК 2022-2023 оны галлагааны улиралд сайжруулсан шахмал худалдан борлуулах хүсэлтэй иргэдийг өнөөдрөөс www.burtgel.ttt.mn цахим хаягаар бүртгэж эхлэлээ.
Галлагааны улиралд нийслэлийн хэмжээнд 670 цэгээр сайжруулсан шахмал түлш худалдан борлуулах бөгөөд дүүрэг тус бүр хүн ам, өрхийн тооноос хамааран харилцан адилгүй байх юм.
2021-2022 оны галлагааны улиралд хамтран ажилласан борлуулалтын цэгүүдээс үр дүнгээ 100 хувь хангалттай дүгнүүлсэн 423 цэгтэй гэрээгээ үргэлжлүүлж, хамтран ажиллана. Үлдсэн 247 цэгийг дээрх цахим хаягаар хүсэлт илгээсэн иргэдээс сонгон шалгаруулж гэрээ байгуулна.
Сонгон шалгаруулалтыг НАБТГ-ын дарга Ц.Ганболдоор ахлуулсан хамтарсан ажлын хэсэг шалгаруулах юм. Иргэдийн хүсэлтийг энэ сарын 21-ний 18 цаг хүртэл хүлээн авна.
“Тавантолгой түлш’’ шинэ салбараа нээлээ
“Тавантолгой түлш’’ ХХК-ийн Хэрэглэгчдэд үйлчлэх төв Налайх дүүрэгт салбараа нээж хяналтын ажилчдыг бэлтгэж, өнөөдөр тус дүүргийн 1-8 хорооны гэр хорооны айл өрхүүдэд ‘шахмал түлшний хэрэглээ, галлагаа, угаарын хийн хордлогоос урьдчилан сэргийлэх сургалтыг ЗДТГ-тай хамтран соёлын ордонд зохион байгууллаа.
Тус сургалтыг “Тавантолгой Түлш”ХХК-н Хяналтын нэгдсэн хэсгийн ахлах мэргэжилтэн Б.Цолмон, Дуудлага харилцааны хэсгийн мэдээлэл хариуцсан мэргэжилтэн Ц.Номин, Засвар үйлчилгээний хэсгийн хяналтын инженер Б.Өлзийбаяр нар явууллаа.
Налайх дүүргийн хэмжээнд 1-8 хорооны нийт 7691 айл өрх 23100 тонн шахмал түлш хэрэглэнэ. Дээрхи айл өрхүүдэд ‘’Тавантолгой түлш’’ ХХК-ийн хэрэглэгчдэд үйлчлэх төвийн шахмал түлшний хяналтын ажилчид пийшин зуухны бүрэн бүтэн байдал, галлагаа, хэрэглээнд нь хяналт тавьж заавар зөвлөмж өгөхөөс гадна айл өрх бүрд угаарын хийн мэдрэгч суурилуулах, өрх бүрийг сайн түлшний карттай болгох ажлыг шат дараатайгаар зохион байгуулахаар ажиллаж байна.
Бидний ажлыг дэмжиж сургалтанд хүрэлцэн ирсэн иргэддээн болон хамтран ажиллаж буй Налайх дүүргийн ЗДТГ-н хамт олонд баярлалаа.
“ЭРДЭНЭС ТАВАНТОЛГОЙ” ХК ГОМДОЛ, МЭДЭЭЛЭЛ ХҮЛЭЭЖ АВАХ СУВГУУДЫГ АЖИЛЛУУЛЖ БАЙНА
“Эрдэнэс Тавантолгой” ХК өөрийн үйл ажиллагаатай холбоотой бүхий л мэдээллийг олон нийтэд нээлттэй ил тод мэдээлэх зорилгоор “Шилэн компани” болох зорилтыг дэвшүүлэн ажилладаг. Энэ хүрээнд компанийн www.ett.mn вэб сайтад мэдээллүүдээ нээлттэй, ил тод байршуулдаг.
Энэ дагуу иргэд хувьцаа эзэмшигчдээс ирсэн гомдол, саналыг хүлээн авч, шийдвэрлэн ажиллаж байна. Тодруулж хэлбэл, компанийн дотоод үйл ажиллагаа, авлига, ёс зүй, жендер хүний эрхтэй холбоотой санал гомдлыг www.ett.mn вэб сайтын Санал гомдол цэсэнд бичгээр, 1800-1072 лавлах утсаар хүлээн авч байна. Иргэд хувьцаа эзэмшигчдээс ирсэн санал гомдлыг компанийн Дотоод хяналт, эрсдэлийн удирдлагын газрын холбогдох мэргэжилтнүүд хүлээн авч шийдвэрлэн ажиллана.
Цахим шилжилт зорилго биш шаардлага болсон
Цар тахлаас өмнө цахим шилжилт бол Монгол улсын цаашдын 100 жилийн хөгжлийг тодорхойлно гээд ярихаар Учрал агаарын юм ярилаа гэж шүүмжилдэг байсан. Өнөөдөр энэ салбарын хөгжил улс орны ирээдүйд ямар чухлыг бид харж байна. Манай улс газарзүйн байрлалын хувьд далайд гарцгүй, экспорт, импортийн хувьд 2 улсаас хараат байдаг болохоор уг хямралд илүүтэйгээр өртсөн. Экспорт буурч, үйлдвэр үйлчилгээний байгууллагууд хаагдсанаар өнгөрөгч 2020 онд манай улсын эдийн засаг 4.6 хувиар агшсан. Хөгжингүй орнуудын сайн туршлагыг харахад төр, хувийн хэвшлийн түншлэл, уялдаа холбоотой хамтын ажиллагаа хөгжлийн үндэс байдаг.
Тиймээс УИХ-ын гишүүн Н.Учрал Инновац, цахим бодлогын байнгын хорооны даргын дэргэд хувийн хэвшлийн төлөөллүүдээс бүрдсэн бодлогын зөвлөл болон Хилийн чанад дахь Монголчуудын Технологийн зөвлөлийг тус тус байгуулан ажиллаж байна.
Олон улсын зөвлөх үйлчилгээний Маккинзи компанийн бизнесийн удирдах ажилтнуудын дунд хийсэн судалгаагаар 2017 онд цахим шилжилтийг зардал бууруулах хэрэгсэл гэж 48 хувь нь харж байсан бол энэ хувь өнөөдөр 10 болтлоо буурч, нөгөө талд 87 хувь нь өрсөлдөгчдөөсөө хоцрохгүй байх, давуу талыг бий болгох, бизнесийн үйл ажиллагаагаа шинэчлэх хэрэгсэл гэж үзэх болж. Бизнес эрхлэгчдийн бодол санаа өөрчлөгдөж ойрын ирээдүйд томоохон өөрчлөлт гарах нь маш тодорхой болоод байна.
Өнөөдөр JCI Mongolia байгууллагаас зохион байгуулсан “Цар тахлын дараах бизнесийн орчин” форумд оролцож “Шинэ сэргэлт”-ийн бодлого, хууль эрх зүйн орчин, мэдээллийн технологийн тусгай бүсийг байгуулахад төр хувийн хэвшлийн хамтын оролцоо зэрэг сэдвээр ярилцаж, санал солилцлоо.
СХД-ийн 151 дүгээр сургуулийн багш нар сертификатаа гардан авлаа
Энэ хичээлийн жилээс миний бие кембриджийн хөтөлбөрийн заах арга зүйч багш нарынхаа оролцоотойгоор ерөнхий боловсролын 151-р сургуульд кембриджийн хөтөлбөрийг хэрэгжүүлэхээр ажиллаж байна. Кембриджийн хөтөлбөрийг энгийнээр хэлбэл үндэсний боловсролын суурь онцлогийг шингээсэн, олон улсын стандарт сургалтын чанарын баталгаажуулалтыг хангах, дэлхийн шилдэг их, дээд сургуулиудад элсэгчдийг бэлтгэх сургалтын шаталсан тогтолцоо юм.
Дэлхийн шилдэг боловсон хүчин, эх орныхоо ирээдүйд үнэтэй хувь нэмэр оруулах шилдэг иргэн төлөвшин гарахад энэхүү багш нар манлайлал үзүүлж ажиллана гэдэгт итгэлтэй байна.
Засгийн газрын 2020-2024 оны үйл ажиллагааны хөтөлбөрийн хэрэгжилт 48.9 хувьтай байна
Засгийн газрын ээлжит хуралдаан 2022 оны наймдугаар сарын 17-нд болж дараах асуудлуудыг хэлэлцэн шийдвэрлэв.
Засгийн газрын 2020-2024 оны үйл ажиллагааны хөтөлбөрийн хэрэгжилт 48.9 хувьтай байна
“Засгийн газрын 2020-2024 оны үйл ажиллагааны хөтөлбөр”, “Монгол Улсын хөгжлийн 2022 оны төлөвлөгөө”-ний хэрэгжилтийн явцыг энэ оны хагас жилийн байдлаар Монгол Улсын сайд, ЗГХЭГ-ын дарга Ц.Нямдорж Засгийн газрын гишүүдэд танилцууллаа.
Засгийн газрын 2020-2024 оны үйл ажиллагааны хөтөлбөрийн хэрэгжилт эхний хагас жилийн байдлаар 48.9 хувьтай байна. Хөтөлбөрийг эрчимжүүлэх зорилгоор удирдлага, зохион байгуулалтаас хамаарч удаашралтай байгаа зорилт, арга хэмжээг энэ оны жилийн эцсийн зорилтот түвшинд хүргэх, санхүү, хөрөнгө оруулалтаас шалтгаалан удаашралтай байгаа зорилт, арга хэмжээг улсын төсвөөс гадна гадаадын зээл, тусламж, хувийн хэвшлийн хөрөнгө оруулалт татах замаар хэрэгжүүлэх боломж, нөхцөлийг судалж, шийдвэрлэхийг даалгалаа. Мөн УИХ-д 2022 онд өргөн мэдүүлэхээр заасан хууль тогтоомжийн төслүүдийг энэ онд багтаан Засгийн газрын хуралдаанаар хэлэлцүүлэн УИХ-д өргөн мэдүүлэхийг Ерөнхий сайд үүрэг болгосон юм. “Монгол Улсын хөгжлийн 2022 оны төлөвлөгөө” нь манай улсыг 2021-2025 онд хөгжүүлэх таван жилийн үндсэн чиглэл, Засгийн газрын 2020-2024 оны үйл ажиллагааны хөтөлбөртэй 100 хувь уялджээ. Уг төлөвлөгөө 6 бүлэг, 23 зорилго бүхий 300 төсөл, арга хэмжээтэй батлагдсан бөгөөд энэ оны эхний хагас жилийн байдлаар биелэлт 47.6 хувьтай байна. Төсөл, арга хэмжээний биелэлтийн тайланд тухайн жилийн ажлын гүйцэтгэлд зарцуулсан хөрөнгийн хэмжээ, шалгуур үзүүлэлтийг хангасан байдал, гаргасан үр дүнг тодорхой тусган бүрэн тайлагнаж байхыг Засгийн газрын гишүүд, холбогдох агентлагийн дарга нарт даалгалаа.
Үндэсний цахим шуудангийн системээр дамжуулан иргэдийн өргөдөл, гомдлыг хүлээж авна
Үндэсний цахим шуудангийн талаар Боловсрол, шинжлэх ухааны сайд бөгөөд Цахим хөгжил, харилцаа холбооны сайдын үүрэг хариуцагч Л.Энх-Амгалан Засгийн газрын гишүүдэд танилцууллаа.
Төрийн байгууллагууд иргэдийн гомдол, өргөдлийг биечлэн, цахим сүлжээгээр, байгууллагын албан ёсны цахим шуудан, Засгийн газрын иргэд, олон нийттэй харилцах 11-11 төв, тусгай дугааруудаар хүлээн авч байна. Эдгээр арга хэрэгсэл нь тухайн иргэнийг мөн эсэхийг таньж баталгаажуулах боломжгүй байгаагаас зарим тохиолдолд бусдын мэдээллийг ашиглан хуурамч мэдээ, мэдээлэл өгөх эрсдэл гарч буйг салбарын сайдын үүрэг хариуцагч Л.Энх-Амгалан танилцуулгадаа дурдаж байв. Тэрбээр “Монгол Улсын үндэсний цахим шуудангийн системийг өнөөдрөөс нэвтрүүлж эхэлж байна. Тодруулбал, 16 наснаас дээш иргэд “И-Mонголиа” системээр дамжуулан и-мэйл хаягтай болж байна. Ухаалаг гар утас хэрэглэж байгаа 3.8 сая хэрэглэгч Монгол Улсад байгаагаас 1.5 сая нь “И-Mонголиа” системийг ашиглаж байна. Үндэсний цахим шуудангийн гол давуу тал нь, иргэн шууд төртэй харьцана. Төр ч иргэнтэй шууд харьцана. Өнөөдрийн байдлаар гадаад паспортын хугацаа нь дууссан 61 мянган хүн байна. Энэ хүмүүст паспортын хугацаа дууссан гэх сануулгыг и-мэйлээр өгч байгаа. Төрийн үйлчилгээг иргэдэд хүргэх цахим шуудангийн тогтолцоонд Монгол Улс албан ёсоор шилжиж байна. Заавал яам, тамгын газрын үүд сахих шаардлагагүй боллоо” гэлээ.
Нийтийн мэдээллийн ил тод байдлын тухай хуулийн 23.3-т “иргэн, хуулийн этгээдэд иргэний хуулийн этгээдийн бүртгэлийн дугаараар үндэсний цахим шуудангийн хаягийг үүсгэнэ” гэж заажээ. Өнөөдрийн байдлаар танилт, нэвтрэлтийн системд бүртгэлтэй 1,600,000 гаруй иргэнд тус системийг ашиглан төрөл бүрийн мэдээлэл, мэдэгдлийг төрийн үйлчилгээний нэгдсэн “И-Монголиа” системээр дамжуулан хүргэх, иргэнийг таньж баталгаажуулсан үндэсний цахим шуудангийн хаягаас өргөдөл, гомдол хүлээн авах, хариу хүргүүлэх боломж бүрдээд байна. Тодруулбал, иргэд төрийн байгууллагад өргөдөл, гомдол гаргахдаа заавал биечлэн эсхүл утсаар өгдөг байсан бол энэхүү системээр дамжуулан төрийн байгууллагад өргөдөл, гомдол гаргах, хариуг хүлээн авах боломжтой болсон гэсэн үг.
Үүнтэй холбогдуулан энэ системээр дамжуулан чиг үүргийн хүрээнд иргэдэд шаардлагатай мэдээлэл, мэдэгдэл хүргүүлэх, өргөдөл, гомдлыг хүлээн авч хариу хүргүүлэх арга хэмжээ авч ажиллахыг Засгийн газрын гишүүд, хууль хяналтын байгууллагын удирдлага, Засгийн газрын агентлагийн дарга, аймаг, нийслэлийн Засаг дарга нарт, уг үйлчилгээнд дэмжлэг үзүүлж ажиллахыг Цахим хөгжил, харилцаа холбооны сайдын үүрэг хариуцагч Л.Энх-Амгаланд даалгалаа.
Геодези зураг зүйн тухай хуулийн шинэчилсэн найруулгыг УИХ-д өргөн мэдүүлэхээр боллоо
Геодези зураг зүйн тухай хуулийн шинэчилсэн найруулгыг хэлэлцэн дэмжээд Улсын Их Хуралд өргөн мэдүүлэхээр болжээ.
Энэ хуулийг 1997 онд баталснаас хойш 11 удаа нэмэлт, өөрчлөлт оруулж, 16 зүйл, 41 хэсэг, заалт өөрчлөгдөн, хоёр хэсэг шинээр нэмсэн байна. Бусад хууль шинэчлэн батлагдсантай холбогдуулан энэ хуулийг өөрчлөх, шинэчлэн найруулах шаардлага үүссэн гэдгийг Барилга, хот байгуулалтын сайд Б.Мөнхбаатар хэллээ. Тэрбээр “Геодези бол улс орны хөгжлийн үндсэн суурь. Геодезийн тоон үзүүлэлт дээр суурилж бүтээн байгуулалт явагддаг. Улаанбаатар хотод өнгөрсөн хугацаанд 360 гаруй геодезийн цэг тэмдэг байсан. Өмнөх 30 гаруй жилийн хугацаанд маш олон барилга баригдаж, зам тавигдсанаас дээрх цэг тэмдгийн тал нь устаж үгүй болсон. Энэ бүхэн хот төлөвлөлтөд сөргөөр нөлөөлж байдаг. Тиймээс геодезийн салбарын эрх зүйн орчныг сайжруулах шаардлага үүссэн. Шинэ хуулийн өөрчлөлтөөр тогтолцоог нарийвчилж, мэдээллийн санг нэгтгэж байна. Хоёрдугаарт, мэдээллийг нийтийн болон тусгайлсан гэж ангилдаг болно. Ингэснээр зарим нууцлалтай газрын зураг, мэдээллийг ил болгож иргэн, аж ахуйн нэгж ашиглах боломж бүрдэнэ. Төрийн байгууллагуудын үүрэг, оролцоог нарийвчилж тусгаж өгсөн. Монгол Улс нутаг дэвсгэрийнхээ 45 орчим хувийг 25 мянгын нарийвчлалтай масштаб зургаар хийж гүйцэтгэсэн байдаг. Үлдсэн 55 орчим хувийг хийж гүйцэтгэх ёстой. Энэ зураг байснаар томоохон төслүүдийн нарийвчилсан зургууд гарч, хэрэгжих үндэс суурь болох юм” гэлээ. Шинэчлэн найруулсан Геодези, зураг зүйн тухай хуулийн төслийг 6 бүлэг, 33 зүйл, 171 хэсэг, 244 заалттай байхаар боловсруулаад байна.
Товч мэдээ:
- “Эрдэнэбүрэнгийн усан цахилгаан станц”-ын төслийн ажлыг удаашруулсан Ховд аймгийн Засаг дарга Б.Дүгэржавыг үүрэгт ажлаас нь чөлөөллөө.
- “Алсын хараа-2050” урт хугацааны хөгжлийн бодлогын баримт бичгийн эхний үе шатны хэрэгжилтийн явцад хяналт-шинжилгээ, үнэлгээ хийсэн тайланг Монгол Улсын сайд, ЗГХЭГ-ын дарга Ц.Нямдорж танилцууллаа. Үүнтэй холбогдуулан Сангийн сайд бөгөөд Эдийн засаг, хөгжлийн сайдын үүрэг хариуцагч Б.Жавхланд баримт бичгийн 2021-2030 онд хэрэгжүүлэх үйл ажиллагааны хэрэгжилт, үр дүнг эрчимжүүлэн сайжруулахад урт, дунд, богино хугацааны бодлогын баримт бичгүүдийн хоорондын уялдаа, нэгдсэн арга зүй, удирдамжаар ханган ажиллахад анхаарч, хэрэгжилтийг жил бүр Засгийн газарт танилцуулахыг даалгалаа.
Засгийн газрын Хэвлэл мэдээлэл, олон нийттэй харилцах газар
Н.Учрал: Хүн бүр сурч боловсрох тэгш эрхтэй ч тусгай хэрэгцээт хүүхдүүдийн сурч боловсрох эрх тунхагийн шинжтэй байна
Манай улсад нийт хөгжлийн бэрхшээлтэй хүүхдийн 30 гаруй хувь нь сургууль, цэцэрлэгт хамрагдаж чадахгүй байна.
Нийслэлийн хэмжээнд 3 тусгай хэрэгцээт хүүхдийн сэргээн засах төв үйл ажиллагаа явуулдаг. Нийслэлийн 41 дүгээр ясли нь Сонгинохайрхан, Баянгол, Сүхбаатар, Чингэлтэй дүүргийн болон орон нутгийн хүүхдүүдийг хүлээн авч сэргээн засах тусламж үйлчилгээ явуулж байгаа юм.
Уг цэцэрлэгийн барилга нь анх 1962 онд ашиглалтад орсон бөгөөд цаашид ашиглах боломжгүй талаар 2010 онд МХЕГ-аас дүгнэлт гаргасан. Гэвч өдийг хүртэл хуучин байрандаа үйл ажиллагаагаа явуулж байна. 2017 онд ашиглалтад орсон цэцэрлэгийн өргөтгөл нь чанар стандартын шаардлага хангаагүй.
Энэ талаар Улсын Их Хурлын гишүүн Н.Учрал:
“Ер нь улсын төсвийн хөрөнгө оруулалтыг төлөвлөхдөө бодит хэрэгцээ, судалгаанд үндэслэх ёстой. Чанаргүй барилга, оновчгүй зарцуулалтаас болж олон хүүхэд сурч боловсрох эрхээ эдэлж чадахгүй байсаар байна. Иймд миний бие 2023 оны улсын төсөвт тус барилгыг нурааж, шинэчлэх ажлыг тусгуулахаар саналаа хүргүүлээд байна.
Энэ жил засгийн газраас нэг ч хүүхдийг цоожтой хаалганы цаана үлдээхгүй, цэцэрлэгт бүрэн хамруулах ажлын хүрээнд бүртгэлжүүлэлт эхэлсэн. Хүүхэд нэг бүрийг тэгш хамруулахын тулд хөгжлийн бэрхшээлтэй хүүхдүүдийг онцгой анхаарах хэрэгтэй. Хууль тогтоомжид эдгээр хүүхдүүдийг тэгш хамруулан сургах, тэгш боломж олгох талаарх зохицуулалтууд нь тунхагийн шинжтэй байдгаас бодитойгоор хэрэгжихгүй байна.
Иймд хөгжлийн бэрхшээлтэй хүүхдүүдийн сурч боловсрох эрхийг бодитойгоор хэрэгжүүлэх, бие даан амьдрах боломжийг бүрдүүлэх зорилгоор Хөгжлийн бэрхшээлтэй хүний сурч боловсрох эрхийг хангах тухай хуулийн төслийг санаачлан олон нийтээр хэлэлцүүлэхэд бэлэн болоод байна.
Удахгүй хөгжлийн бэрхшээлтэй хүүхэд залуус, эцэг эхчүүдтэй хамтран хэлэлцүүлэг зохион байгуулж өргөн барих болно” гэв.