Азийн Шинжлэх ухааны паркуудын холбооны 27-р их хурал /ASPA -2024/ энэ сарын 19, 20-ны өдрүүдэд Монгол Улсад зохион байгуулагдаж байна. “Шинжлэх ухаан, технологийн паркуудын бүс нутагт үзүүлэх үр нөлөө” уриа дор зохион байгуулагдаж буй энэ удаагийн хуралд Цахим хөгжил, инновац, харилцаа холбооны сайд Ц.Баатархүү нээлтийн илтгэл танилцуулна.
Тэрбээр дэлхийн хүлээн зөвшөөрөгдөх программ хангамжийн инженерүүдийг бэлдэх “20к IT инженер” олон улсын хөтөлбөрийг Монгол Улсад амжилттай хэрэгжүүлж, ирээдүйд нэн шаардлагатай мэдээллийн технологийн инженерүүдийг бэлтгэх ажлыг удирдан чиглүүлж, нийслэл Улаанбаатар хотод тулгамдаж буй асуудлыг дэвшилтэт технологи, инновац шингэсэн бүтээгдэхүүн, үйлчилгээний тусламжтайгаар шийдвэрлэх “Ухаалаг Улаанбаатар” хороог ахлан, цаасан тасалбарыг цахимд шилжүүлэх, газрыг цахимаар олгох, хогийг мөнгө болгох зэрэг олон ажлыг санаачлан хэрэгжүүлж байсан.
Энэ удаагийн Азийн Шинжлэх ухааны паркуудын холбооны 27-р их хуралд тэрбээр мэдээллийн технологийн салбарыг эдийн засгийн нэг гол бүтэц болгон хөгжүүлэх, шинжлэх ухааны ололт инновац шингэсэн бүтээгдэхүүн үйлчилгээг бизнесийн салбарт нэвтрүүлэх бодлогыг танилцуулах гэж байна.
Та бүхнийг 2024 оны 08 дугаар сарын 20-ны өдөр болох Азийн шинжлэх ухааны паркуудын холбооны 27-р их хурлын нээлтэд хүрэлцэн ирж, харилцаа холбоо, инноваци, мэдээллийн технологийн салбарт төрөөс баримталж буй бодлого, хэрэгжүүлж буй ажлууд, томоохон төсөл хөтөлбөр зэрэг шинэ соргог мэдээ, мэдээллийг сонсох боломжтой гэдгийг дуулгахад таатай байна.