УИХ-ын чуулганы өнөөдрийн нэгдсэн хуралдаанаар “Монгол Улсын хөгжлийн 2023 оны төлөвлөгөө батлах тухай” тогтоолын төслийг хэлэлцэж байна.
Монгол Улсын хөгжлийн 2023 оны төлөвлөгөөний төсөлд яам, агентлаг болон нутгийн захиргааны байгууллагаас нийт 643 төсөл хэрэгжүүлэх санал ирүүлсэн бөгөөд нийт 41.7 их наяд төгрөгийн санхүүжилт шаардлагатай аж. Эдгээр саналыг Хөгжлийн бодлого, төлөвлөлт түүний удирдлагын тухай хуульд заасан шаардлага болон төлөвлөлтийн арга зүйг баримтлан хянаж, 18 зорилго бүхий 75 багц ажил хэрэгжүүлэхээр төсөлд байна. Төсөлд тусгасан ажлыг хэрэгжүүлэхэд 15 их наяд 137 тэрбум төгрөгийн санхүүжилт шаардлагатай. Үүнээс улсын төсвийн хөрөнгөөр 1 их наяд 887 тэрбум 663 сая төгрөг, гадаадын зээл, тусламжаар 1 их наяд 646 тэрбум төгрөг, орон нутгийн төсвийн хөрөнгөөр 420 тэрбум төгрөг, гадаад, дотоодын хөрөнгө оруулалтаар 6 их наяд 34 тэрбум төгрөг, төр, хувийн хэвшлийн түншлэлээр 4 их наяд 197 тэрбум төгрөг, бусад эх үүсвэрээс 951 тэрбум 458 сая төгрөгийн санхүүжилтийг хийхээр Засгийн газар төлөвлөсөн байна.
Хэлэлцэж буй асуудалтай холбогдуулан УИХ-ын гишүүн Б.Бат-Эрдэнэ нарын гишүүд Тавантолгой ДЦС, Газрын тос боловсруулах үйлдвэрийн явцын талаар тодрууллаа. УУХҮ-ийн сайд Г.Ёндон, “Өнөөдрийн байдлаар Газрын тосны үйлдвэрийн бүтээн байгуулалтад 570 хүн газар дээрээ ажиллаж байна. Үйлдвэр дөрвөн багц ажил, болон дамжуулах хоолойны ажлаас бүрдэж байгаа. Дамжуулах хоолойн тендерийн гэрээнд гарын үсэг зурсан” гэлээ.
Эрчим хүчний дэд сайд Б.Баярмагнай говийн бүсийн цахилгаан хангамжийг сайжруулах үүднээс Тавантолгой дулааны цахилгаан станцын тендер зарласан бөгөөд ирэх сарын 2-нд нээнэ хэмээв. Ийнхүү 13.00 цаг болсон тул чуулган түр завсарлаж, 14.00 цагт үргэлжлэх боллоо.
