Монголын Эдийн засгийн чуулганы “Хот хөдөөгийн сэргэлт” урьдчилсан хэлэлцүүлэг 2022.03.25-ны өдөр боллоо. Барилга, хот байгуулалтын сайд Б.МӨНХБААТАР “Монголын эдийн засгийн чуулган-2022” урьдчилсан хэлэлцүүлгийн эхэнд “Хөшигийн хөндий дэх Шинэ Зуунмод хотын нэгдсэн төлөвлөлт, эхний ээлжийн инженерийн дэд бүтцийн бүтээн байгуулалтын төсөл”-ийн талаар танилцууллаа. Тэрбээр “Улаанбаатар бол үйлчилгээний хот. Харин Хөшигийн хөндийд байршиж босох шинэ хот нь суурьшлын бүхий эдийн засгийн чөлөөт бүс, тээвэр ложистикийн төв болж хөгжинө. “Чингис хаан” олон улсын нисэх онгоцны буудлаас гадна “Богд хаан” төмөр зам, босоо тэнхлэгийн олон улсын АН-3 авто замууд энэ бүс нутагт тавьж, гурван замын уулзвар зангилаан дээр байгаа учраас эдгээр замуудыг түшиглэн олон улсын хуурай зам, агаарын болон төмөр замын холимог ачаа болон зорчигч тээврийн төвийг байгуулна. Тодруулбал, Хөшигийн хөндийн эдийн засгийн чөлөөт бүсэд тогтвортой аялал жуулчлал, амралт зугаалгын ресорт, соёлын бүтээлч үйлдвэрлэл, олон улсын худалдааны төвүүд, байгальд ээлтэй үйлдвэрлэлийн бүсийг байгуулж, Евро азийг холбосон олон улсын тээвэр логистикийн төвийг хөгжүүлнэ. Онгоцны буудлын хойд талд интертаймент төвүүд, өндөр зэрэглэлийн зочид буудал, орчин үеийн загвар стандарттай үзэсгэлэнгийн танхим заалууд байгуулж, жуулчдыг татах орон зайг төлөвлөсөн” гэв. Тус илтгэлийн дараагаар “Шинэ суурьшлын бүс, дагуул хот, эдийн засгийн чөлөөт бүсийн бүтээн байгуулалтыг эрчимжүүлэх бодлого” сэдэвт хэлэлцүүлэг өрнөлөө.
Хэлэлцүүлэгт Барилга, хот байгуулалтын сайд Б.Мөнхбаатар, УИХ-ын гишүүн С.Одонтуяа, Нийслэлийн Засаг даргын орлогч Б.Сүхбаатар, Хөшигийн Хөндийн бүтээн босголтын асуудал хариуцсан Засгийн газрын Бүрэн эрхт төлөөлөгч Д.Оюунхорол, АХБ-ны Монгол дахь суурин төлөөлөгчийн газрын ахлах мэргэжилтэн Арнауд Хэкман, Монголын Барилгын Үндэсний Ассоциацийн тэргүүн дэд ерөнхийлөгч Н.Баярсайхан нар оролцож, “Шинэ Зуунмод” хотын төлөвлөлттэй холбоотой асуултуудад хариулт өглөө.